Accessibility links

Кайнар хәбәр

Medvedev-Putin: "yaxşı häm yaman abzıylar" uyını


Uzğan atna Medvedev Könbatış belän "awışqan koymalarnı tözätü" belän mäşğül buldı. Putin kiresen eşläwen däwam itte. Bu närsä - tışqı säyäsät öçen köräşme, ällä Kremlneñ yaña uyınımı?

Pänceşämbedä berençe Yewropa säfäre belän Germaniägä kilgäç, Dmitriy Medvedev NATOnıñ tağı da kiñäyüe Mäskäwneñ Könbatış belän mönäsäbätlärenä zıyan kiteräçäk, dip kisätte.

Berlinda Tışqı bäyläneşlär şurasında yasağan çığışında Medvedev Salqın suğış çorındağı Helsinki kileşüe räweşendä Yewropanıñ yaña iminlek kileşüen tözergä çaqırdı.

Şimbä könne Peterburda iqtisadi forumda çığış yasap, dönyadağı finans krizisı öçen Quşma Ştatlarnı ğayepläde.

Bu belderülär Kremlneñ soñğı yıllardağı äwzem tışqı säyäsäteneñ däwamı bulıp tora. Şulay da, ayırma bar. Medvedev Putinnan yomşağraq söylärgä tırışa.

Medvedev yomşağraq söyli

“Salqın suğışnıñ tämamlanuı Yewropa sivilizatsiäseneñ öç tarmağı bulğan Rusiä, Yewropa Berlege häm Tönyaq Amerika arasında tigez xezmättäşlekkä şartlar tudırdı. İmanım kamil, - dide Medvedev Berlinda, - Atlantizm berdän-ber prinsip bularaq inde iskerde. Xäzer bez Vankuverdan alıp Vladivostokka qadär Evro-Atlantik berdämlek turında süz yörtergä tieş. ”

NATOnı başqa berär iminlek berläşmäse belän alıştıru fikeren xuplawçılar äle küp bulmas. Şulay da, fikerneñ yañğırawı iğtibarğa layıq.

Medvedevnıñ tele “urtaq Evropa yortı” turında söylägän elekke sovet citäkçese Mixail Gorbaçevnı xäterlätsä, Putin yış qına Salqın suğış çorına xas tezmälär qullana. Misal öçen, Fransiägä soñğı säfäre waqıtında ul Quşma Ştatlarnı “qurqınıç albastı” kebek qılanuda ğayepläde.

Tışqı säyäsät öçen kem cawaplı?

Rusiäneñ AQŞtağı ilçese qatı qullı diplomat sanalğan Yuriy Uşakovnıñ xökümät apparatına qaytarıluın küzätüçelär Putinnıñ tışqı säyäsätne üz qulına aluı dip bäyäläde.

Waşingtondağı Dönya iminlege institutında Rusiä häm Evraziä bülege mödire Nikolay Zlobin süzlärençä, Putin tışqı säyäsätne üz qulınnan ıçqındırırğa telämi.

“Rusiäneñ tışqı säyäsät idaräsendä üzgäreşlär başqarıla. - di Zlobin. – Uşakovnıñ Mäskäwgä qaytarıluı tışqı säyäsätneñ qayber öleşeläre xökümätkä küçerelüen añlata.”

Şul uq waqıtta, Medvedev prezident bularaq, hiçyuğı qäğazdä, tışqı säyäsät öçen cawaplı bulıp qala. Küzätüçelär, bu närsä – köndäşlekme, ällä kileşenep başqarılğan uyınmı, dip baş wata.

Aldan kileşengän uyın

Waşingtondağı Nixon üzägendä Rusiä belgeçe Nikolas Gvozdev fikerençä, Putin belän Medvedev bu uyınnı kileşep başqara.

“Minemçä, bu – ‘yaxşı häm yaman abzıy’ uyını, - di Gvozdev. – Ber ük waqıtta bu tışqı säyäsätne büleşü tırışlığı. Yänäse, Medvedev, yaxşı abzıy bularaq, kileşülär imzalıy, xezmättäşlek, aqça eşläw turında söyläşä. Ä Putin, ‘yaman abzıy’ bularaq kilä dä, ä xäzer äydägez atom iminlege turında söyläşäbez, di.”

Germaniägä säfäre waqıtında Medvedev “yaxşı abzy” bulıp uynadı: säwdä häm iqtisadi bäyläneşlär, Rusiäneñ Yewropa Berlege belän xezmättäşlege turında söyläde.

Putin xuca bulıp qala

Medvedevnıñ yuğarı däräcäsenä qaramastan, belgeçlär fikerençä, Rusiädä küp närsä öçen, şul isäptän, tışqı säyäsät öçen dä, haman da Putin cawap birä.

“Rusiä global säyäsättä” jurnalı baş möxärrire Fedor Lukyanov süzlärençä, Könbatış äle dä Putinnı “xuca” dip sanıy.

“Fransiä säfäre şunı kürsätte, Könbatış äle qaraşın üzgärtmägän, - di Lukyanov. – Fransiä Putinnı xökümät kenä, ä däwlät başlığı däräcäsendä qabul itte.”

Putin üze dä şul däräcädä bulırğa tırıştı. “Le Mond” gäzitenä birgän äñgämäsendä ul NATOnıñ kiñäyüen, Könbatışnıñ İran säyäsäten tänqitläde. Matbuğat oçraşuında, keşe xoquqları turındağı sorawğa, andıy problemnar här ildä bar, dip Fransiä törmälären telgä aldı.

İke başlı sistem älegä eşli

Rusiä belgeçe Nikolas Gvozdev süzlärençä, Putin-Medvedev mönäsäbärlärendä “köndäşlek çatqıları” bulsa da, älegä alar sizelmi diärlek.

Putin premier bulğaç xökümätneñ quäten arttırdı. Prezidium dip atalğan yaña buın buldırdı, anda cide vitse-premier häm cide ministr kerä, şul isäptän, Medvedevqa turı buysınğan öç ministr.

Gvozdev süzlärençä, bu yaña super xökümät ike başlı patşanı xäterlätä. Bar qararlarnı da Putin belän Medvedev, yä alarnıñ keşeläre qabul itä.

Älegä bu ike başlı sistem eşli, çönki alar küpçelek mäsälädä ber ük qaraşta tora. Läkin, belgeç fikerençä, kiläçäktä alar arasında köndäşlek köçäyergä mömkin.

XS
SM
MD
LG