Accessibility links

пәнҗешәмбе, 8 декабрь 2016, Казан вакыты 19:19

Rusiädä millätara näfrät nigezendä cinayätlär sanı bıyıl iñ yuğarı däräcägä citkän. Läkin eş san artuda ğına tügel. Höcümçelär aıyruça yırtqıçlıq belän eş itä başlağan.

36 yäşlek üzbäk xanımı, Kamola, Mäskäwdä yäşi. Uzğan ay eşenä barğanda, metrodan çığuğa, qatu suğudan taşlı idängä sığılıp töşkän. Höcümçelär ikäw bulğan. Berse totıp torğan ikençese qıynağan. Qıynawçınıñ qulında ciz kastet bulğan.

"İke keşe kötmägändä arttan kilep suqtı. Başta uñ küzemä suqtılar, annarı borınımnı, yañaq söyägemne sındırdılar. Şunduq sığılıp töştem. Gärçä, min berni eşlämädem, bälki yawlıqlı bulğanıma höcüm itkännärder."

Añın yuğaltqan xälendä Kamola yaqındağı xastaxanägä kiterelgän. 4 kön añına kilä almağan. Xäzer baş mienä häm bitenä operatsiä kötep yata. Alay da, ike bala anası, isän qalğanına şöker itä.

Mäskäwdäge Sova oyışması mäğlümätenä qarağanda, şuşı yılda ğına taqırbaşlar 57 keşene ütergän, 117 keşe cäräxätlär alğan. Yıl axırına qorbannar sanı uzğan yılğı 80 sanın da uzıp kiter dip kötelä, di Sova citäkçese Galina Kojevnikova.

"57 sanı şaqtıy kimetelgän. Mäğlümat tabu xäzer bik awır. Bıltır da awır ide, läkin bıyıl inde äytep bulmaslıq awır. Mäğlümät çaralarında ul yuq. Xoquq yaqlaw oyışmaları bötenläy ber närsä dä birmi."

Belgeçlär äytüençä, xäzer höcümçelär, aıyruça yırtqıçlıq belän, xädäflären saylap eş itä.

Uzğan yıl bitlek kigän taqırbaşlarnıñ ike qara tänle keşene ütergäne töşerelgän, internetta uranştırılğan yazma küplärne tetränderde.

Başta eçke eşlär ministrlığı monı uydırma dip atadı. Läkin soñraq ber Dağıstan keşese başı kiselgän qorbanda üz tuğanın tanıdı.

Sova belgeçläre äytüençä, xakimiät monı belä, läkin mäsäläne xäl itü öçen berni eşlämi dirälek. Kiresençä, Kremlneñ gruzinnarnı ildän çığaru, çit il keşelären bazardan quu kebek ğamälläre millätara näfrätneñ artuına kiterä.

Soñğı waqıtta taqırbaşlar xädäf itep Üzäk Aziä keşelären saylıy başlağan. Bıyıl üterelgän 57 keşeneñ 31-e Üzbäkstan, Tacıqstan häm Qırğızstannan. Keşe xoquqların yaqlawçı Svetlana Ganuşkina, xakimiätneñ çaralar kürmäwen, Üzäk Aziä keşeläreneñ tözeleştä qara eştä eşläwe häm räsmilärneñ tözeleş sänäğatendä mänfägate belän añlata.

"Xäzer qorbannarnıñ kübese Üzäk Aziädän. Xakimiät monı belä. Üzäk Aziä keşeläre xäzer qol xälendä. Alarnıñ mesken buluı alarnıñ xezmäten qullanğan keşelärgä faydağa. Bu keşelär isä xakimiät belän yaqın."

Mäskäwdäge emigrantlarğa yärdäm törkeme citäkçese Cäwhär Djuraeva süzlärençä, bu keşelär bik awır xäldä, köçle basım astında yäşi. Qayberläre xättä üzenä qul sala.

Mäskäwdä 15 yıl yäşäp, urıs telen yaxşı belän Cäwhär üze dä uramda üzen imin xis itmi. Monıñ öçen közgegä qaramasqa kiräk di ul.

XS
SM
MD
LG