Accessibility links

дүшәмбе, 5 декабрь 2016, Казан вакыты 21:51

AQŞ prezidentı George Buş Yewropa säfären däwam itep comğa könne Vatikanda Rim papası Benedikt XVI belän oçraştı. Annarı Parijğa barıp İqtisadi xezmättäşlek häm täräqqiät oyışmasında çığış yasadı.

Rim papası Benedikt XVI, ğadäti qunaqlar öçen qaralğan tärtipne bozıp, amerikan prezidentı George Buş häm anıñ xäläl cefete Lauranı Vatikan baqçasında qarşı aldı. Annarı alar söyläşü öçen izge John manarasına yünäldelär.

Papa qunaqların ğadättä üzeneñ kitapxanäsendä qabul itä. Urta ğasır çorı manarası maxsus qunaqlar öçen genä qaralğan.

Küräseñ, Benedikt XVI George Buşqa ayırım xörmät kürsätep, küptän tügel üzenä Aq Yortta kürsätelgän xörmätkä cawap birergä telägän.

Papanıñ Quşma Ştatlarğa säfäre aña 81 yäş tulğan waqıtqa turı kilde. Anıñ tuğan köne 16 aprel könne Aq Yortta 21 qorallı salut häm 13500 qunaq qatnaşında zurlap ütkärelde.

Rim papası häm amerikan prezidentı Ğıyraq mäsäläsendä törle qaraşta bulsalar da, küp kenä başqa, bigräk tä, äxlaqıy mäsälälärdä, alar ber qaraşta tora, abortlardan alıp ber cenesle niqaxlarğa qadär.

Buş üzeneñ dindarlığın yış qına iskärtep tora. Papa anıñ bu ğamälen yuğarı bäyäli bulsa kiräk.

Benedikt XVI belän oçraşudan soñ amerikan prezidentı Parijğa kilde häm anda İqtisadi xezmättäşlek häm tärärqqiät oyışmasında çığış yasadı.

"Salqın suğışta ciñgän şikelle, xäzer bez tağı da külämleräk suğışta ciñergä tieş – idealar suğışında. – dide Buş. – Ber yaqta sivilizatsiäneñ fundamental nigezlären yaqlawçılar: fiker törlelegen, namus ireklegen, zäğiflärne yaqlaw xoquqların."

Buş bu çığışında Quşma Ştatlar belän Yewropa Berlege arasında xezmättäşlekne nığıtırğa, islam ekstremizmına qarşı köräştä berdämlekkä çaqırdı.

Buş Parijda ike kön qala häm Fransiä prezidentı Nikola Sarkozi belän dä oçraşa.

Yewropa säfäre barışında amerikan prezidentı Sloveniä, Germaniä, İtaliädä, Fransiädä buldı. Alğa taba anıñ Britaniä häm Tönyaq İrlandiägä baruı qaralğan.

XS
SM
MD
LG