Accessibility links

чәршәмбе, 7 декабрь 2016, Казан вакыты 23:14

Törkiädä xalıqara radío xezmätkärläre oçraşuı bula. Di-djeylar, diktorlar Tarqan konsertına da baraçaq. Ä ber atnadan cırçı Rusiägä kilä.

20 iyun könne Törkiäneñ Antalia yağı Manawğat rayonında “Berençe xalıqara radío xezmätkärläre oçraşuı” bula. Anı “Uzman Mediya Experi” şirkäte häm Manawğat rayonı idaräse oyıştıra.

İnternet alıp baruçı därten tapşıra almıy

Programma qısalarında Törkiä radíolarındağı yoldızlar belän oçraşu da qaralğan. Ayırım alğanda İzzet Öz isemle bilgele törek radíoçısına tantanalı şartlarda maqtaw bilgesen birergä telilär. Anıñ turında oyıştıruçı Erdem Temiz: “Törkiäneñ iñ bilgele radío alıp baruçısı”, dip añlattı. İzzet Özneñ şulay uq törektäge qayber dönyawi qaraşlılarnı şaqqatırıp CNN qanalına “tatar”-törki tübätäy dä kiep çıqqanı bar.

Erdem Temiz, radiolarnı Törkiädäge tansıq häm xalıqçan mäğlümat çığanağı, dip sanıy. “İnternet ta bar, tik ul radiodağı kebek alıp baruçınıñ can qaynarlığın tapşıra almıy. Şuña kürä bez radíoçılarnı tuplarğa buldıq”, di. Äytik, şul uq İzzet Öz da efirda “canım” dip yış qabatlıy.

Oyıştıru komitetınnan Erdem Temiz
Şulay uq Temiz “Azatlıq” radiosına, Europa häm Aziä illärennän yegermedän artıq radiodan di-djeylar yäki alıp baruçılar çaqırıluın, äytte.

Oçraşuda täcribä urtaqlaşu kötelä

Radio xezmätkärläre üzara täcribä urtaqlaşaçaq. Şulay uq alar törek radíolarındağı eş belän dä tanışaçaq. Çit il radíoçıları iärçen aşa üz dulqınnarına da çığar yäki xäbär birä alır, dip kötelä.

Radio yoldızları belän oçraşırğa Törkiäneñ mädäniät häm turizm ministrı da kiler dip kötelä. “Berençe xalıqara radio xezmätkärläre oçraşuında” Manawğat idaräse başlığı Zäynäl Şänol “yort xucası” bulaçaq.

Millionnarça rusiäle qıznıñ yaratqanı

Oyıştıruçılar beroçtan turizmnı reklamlarğa da teli. Ni disäñ dä, Antalia yağı şunnan ikmäk aşıy bit.

Şulay uq di-djeylar üzlärenä ikmäk birüçene dä kürä alaçaq. Alar Törkiäne dönyağa tanıtqan cırçı, Rusiä radíolarında daimi uynatıluçı Tarqan (Tarkan) konsertına çaqırulı. Bilgele bulğança, Tarqannıñ Qazannıñ meñ yıllığına da kilä dip kötkännär ide. Tik ul kilmäde. Bıyıl da kürenmi.

Anıñ qarawı Rusiädäge Törkiä mädäniät yılı qısalarında ul Mäskäwdä häm Peterburda 25-26 iyun könnärendä çığış yasayaçaq. Urıs saytları: “Millionnarça rusiäle qıznıñ yaratqan keşese, etno-pop yoldızı häm ğädi genä qaynar törek yegete Rusiägä kilä”, dip yaza Kleo.ru. Tarqan “Metamorfoz” isemle älbomın Rusiä tıñlawçısına täqdim itäçäk. Ul anda saqal belän fotoğa töşkän. Mäskäw konsertına bilet 1300 – 13000 sum aralığında.

Manawğatta “Berençe xalıqara radío xezmätkärläre oçraşuı” oyıştıruçı Erdem Temiz dä Tarqannıñ qıymmätle cırçı buluın tanıy. Tik qunaqlarğa tülärgä turı kilmäyäçäk. Alar öçen Törkiädä uzuçı konsertqa Manawğat rayonı idaräse tülärgä teli.
XS
SM
MD
LG