Accessibility links

шимбә, 3 декабрь 2016, Казан вакыты 12:38

İlneñ sport qazanışları anıñ iqtisadi üseşenä bäyle. Pekin uyınnarında Qıtay Quşma Ştatlarğa citdi köndäşlek kürsätäçäk, Rusiä öçençe urın alaçaq, dip farazlana.

PriceWaterhouseCoopers kiñäş şirkäte belgeçläre 2008 yıl Olimpiä uyınnarında qaysı il nindi urın alaçağın farazlap qarağan. Tege yä bu ilneñ sport näticälärenä täesir itkän faktorlar arasına uzğan yıllardağı qazanışlar, sport ölkäsendä planlaw ğına tügel, ä ilneñ iqtisadi xäle dä kertelgän. Monnan tış, ildäge xalıq sanı, urtaça kerem, uzğan Olimpiä uyınnarında medallär sanı iskä alınğan.

Şunısı qızıqlı, zamanında ilneñ Warşaw kileşüe oyışmasına kerü-kermäwe dä isäplängän. Belgeçlär fikerençä, bu möhim, çönki elekke sotsialistik lager illäre sport ölkäsendä däwlät planı ürnäge bulğan.

Medallär häm iqtisad


Ğomümän alğanda, ilneñ iqtisadi quäte, xalıq sanı zurraq bulğan sayın, anıñ medallär sanı da kübräk, - di tikşerü citäkçese John Hocksworth.

Belgeçlär fikerençä, bu uyınnarda Rusiä medallär sanı belän öçençe urın alaçaq. Bu Rusiäneñ xäzerge iqtisadi xälennän yuğarıraq kürsätkeç bulaçaq. Germaniä belän Avstraliä şaqtıy qalışıp, dürtençe häm bişençe urınnar alaçaq.

Quşma Ştatlar, iqtisadi töşenkelek kiçerügä qaramastan, zur uñış qazanaçaq. Läkin uyın xucaları qıtaylılar, amerikannarnı da uzıp kitä ala, çönki Qıtay iqtisadı xäzer üseş kiçerä.

2004 yıl Afin uyınnarında AQŞ berençe urın alğan ide. 4 yıl eçendä sport ölkäsendä şaqtıy üzgäreşlär buldı. 2008 yıl Pekin uyınnarında Qıtay, ber-ike medal kübräk alıp, Amerikanı ikençe urınğa qısrıqlap çığarırğa mömkin.

Şulay uq iqtisadi üseş kiçergän Polşa, Braziliä, Meksika häm İndonieziä dä uzğan uyınnar kürsätkeçlären uzdırırğa mömkin. Ä menä Britaniä, kiresençä, ike medal azraq qazanır dip kötelä.

Kileşmäwçelär dä bar

Globalläşü problemnarı institutı citäkçese Mixail Delyagin bu tikşerenügä şik belderä. Anıñ fikerençä, ilneñ sport uñışları urtaça keremgä tügel, ä däwlätneñ sport ölkäsendä säyäsätenä bäyle. Qayber illärdä, misal öçen, Germaniä, Yaponiädä däwlät sportqa zur ähämiät birmi, - di Delyagin. – Qıtay isä hiçşiksez berençe urın alaçaq, çönki anda Olimpiadağa bez suğışqa äzerlängän kebek äzerlänälär.

Quşma Ştatlar här ölkädä berençe bulsa da, bu uyınnarda ikençe bulaçaq. Rusiädä sport tarmağında wazğiät yaxşıra, läkin Amerka belän Qıtayğa äle yıraq, - di Delyagin. - AQŞta sport – biznes, däwlät monıñ öçen barın da eşlägän. Rusiädä idä sport neft dollarları xisabına ğına yäşi. Amerikadan qalışu zur. Zamanında ildä sport üseşenä zur öleş kertkän sport mäktäpläre sistemı xäzer cimerelgän xäldä.

XS
SM
MD
LG