Accessibility links

чәршәмбе, 7 декабрь 2016, Казан вакыты 15:42

Parlament saylawınnan soñ başlanıp kitkän uram çualışları Ulanbatırda ğädättän tış xäl kertügä kiterde. Yarsığan xalıq anda xakimiättäge partiäneñ baş idaräsenä ut törtte, bäreleşlärdä 5 keşe hälak buldı.

Moña qädär Mongoliä sovet stilendäge sotsializm sazlığınnan demokratiägä şaqtıy tınıç häm uñışlı ğına küçep barğan, Qıtay belän Rusiä arasında yuğalıp qalğan ber il bularaq bilgele ide.

Uzğan tönnän soñ inde bolay äytep bulmıy - ilneñ başqalası Ulanbatırda meñlägän keşe cıyılıp, tärtip saqlaw köçläre belän bäreleşlär oyıştırdı häm xakimiättäge xalıq-revolutsion partiäseneñ baş idaräsen yandırdı.

Şuşı çualışlarğa atna azağında uzğan parlament saylawı säbäp buldı. Aldan ütkärelgän fiker beleşülär demokratik partiäneñ häm elekke kommunistlar - xalıq-revolutsion partiäseneñ ciñü şansları bertigez buluın kürsätep kilde.

Ulanbatırda xakimiättäge partiä binası yana
Ämma tawış birü urınnarı yabıluğa xakimiättäge partiä üzeneñ ciñüe xaqında söyli başladı häm berençe näticälär dä şunı kürsätte. Oppozitsiädäge demokratlar isä xökümätne saylaw näticälären bozuda, tupas xärämläşüdä ğäyepläde. Xislär taşqını köçäyep protestlar Ulanbatır uramnarına çıqtı.

"Sez menä şuşı keşelärgä, şuşı xalıqqa ğına qarağız. Bezdä äle mondıy saylawnıñ bulğanı yuq ide, bıyılğısında xärämläşü çamadan tış buldı", di uram cıyınına quşılğan 40 yäşlek Purevdarj Batmunx.

Mongoliä xakimiäte yuğalıp qalmadı, şuşı cualışlarda qatnaşuçılarğa qarşı qırıs çaralar kürelde - 20-läp keşe qulğa alındı, ä ilneñ prezidentı Nambarın Enxbayar başqalada 4 könlek ğädättän tış xäl kertte.

Şul färman nigezendä xalıqqa cıyınnar ütkärü tıyıla, monı bozuçılarğa qarşı köç qullanu röxsät itelä, mäğlümät çaralarınıñ irekle eşläwe çiklänelä.

Sişämbe könne mongol räsmiläre soñğı çualışlarda kimendä 5 keşeneñ ülüe, 200-läp keşeneñ törle cärxätlär aluın xäbär itte. Başqala Ulanbatırda inde tınıçlıq xökem sörä, şähärne xärbilär kontrol itä dip belderä anda eşläwçe Könbatış wäkilläre.

Xakimiät oppozitsiäne üz tarafdarların tınıçlandıruğa, qanuni tärtipne bozmasqa öndi. Başqalada komendant säğäte ğämäldä qala.
XS
SM
MD
LG