Accessibility links

пәнҗешәмбе, 8 декабрь 2016, Казан вакыты 13:02

İslam belän tarixi bäyläneşläre bulğan Kamden qalası şurası İslam mäktäbenä qarşı qarar qabul itte. Şähär xalqı da mädräsäne xuplamıy.

Kamden xalqı şähärneñ moñarçı bulğan tınıç tormışı betäçäk, dip borçıla. Soñğı yıllarda biregä kilep urnaşqan möselmannar qalanıñ yıraq bistäläreneñ bersendä 1200 bala öçen İslam mäktäbe tözergä röxsät sorağan. Ämma xalıq ta, şähär şurası da moña qarşı.

“İslam – ber dä möxitkä häm cirle ğoref-ğädätlärgä qarap üzgärüçän mädäniät tügel. Küp kenä dinnär häm mädäniätlär integratsiälänä häm cirle möxitkä yaqınlaşırğa teli , ämma islam – yuq. İslam täğlimatı monı röxsät itmi”, di Kamden xalıq şurası prezidentı Emil Sremçewiç.

Kamdennıñ Qorän cämğıyate başlanğıç häm urta belem biräçäk 1200 balağa isäplängän mäktäp tözergä röxsät sorağan. Alarnıñ qayberläreneñ genä Qorän uqu häm dini täğlimatne öyränäçäkläre planlaştırılğan.

Şähär şurası cämğıyatneñ möräcäğäten may ayında qarağan häm anı kire qaqqan.

“Möräcägät kire qağıldı, çönki anı planlaştıruda qayber citeşmägän yaqları tabıldı”, dide Kamden şähär başlığı Kris Patterson.

Kire qağunıñ säbäbe itep – tözeleş öçen cirneñ döres saylanmağanı äytelde. Qorän cämğıyate täqdim itkän urın – elekke ferma cire bulğan, anda cirneñ çistalığı däräcäse başlanğıç mäktäp balalarına yaraqlı tügel, dip tabılğan. Şulay uq yaña tözeleştän 600 genä metrda inde ber mäktäp bar ikän.

Qorän cämğıyate şähär şurası qararı belän riza tügel, alar täqdimne üzgärtep şurağa yañadan möräcägät itärgä cıyına.

Kamdennıñ İslam belän tarixi bäyläneşläre bar

Awstraliäneñ Kamden şähärendä 1920 yıllarda yäşägän alman aristoqratı Frederik fon Frankenberg häm anıñ xatını öyendä hind sufiları yulbaşçısı xäzrät İnayat Xan uquları uzğan. Alman ğäiläse anıñ şäkertläre bulğan.

Awstraliädäge möselman cämğiätläre 11 sentäbr terror höcümnärennän soñ üzlärenä qarata doşmanlıqnıñ artuına zarlana. İlneñ İslam şurası räise Ali Rud şuranıñ internettağı säxifäsendä, Awstraliäneñ terror qannurı nigezendä barı tik ğäräplär qulğa alına, dip yaza.
XS
SM
MD
LG