Accessibility links

дүшәмбе, 5 декабрь 2016, Казан вакыты 11:29

Medvedevnıñ uzğan atnada Üzäk Aziägä säfären Mäskäw zur uñış dip bäyäläde. Yağulıq ölkäsendä ber nindi dä kileşügä qul quyılmadı. Säfärneñ uñışı närsädä ide?

Azärbaycan, Törkmänstan häm Qazaqstan säfärennän prezident Medvedev qulğa totarlıq ber nindi dä näticä alıp qaytmadı. Bu illärdä ul iyülneñ 3-6 buldı. Älege öç il barısı da yağulıq ölkäsendä Rusiä öçen bik möhim illär. Prezidentnıñ maqsatı – Rusiäneñ bu illärdä täsire buluın üz küze belän kürü häm kiläçäktä Kaspiy nefteneñ Rusiä aşa ütäçägen tämin itü ide.

“Rusiäneñ bu adımğa baruına tağın ber citdi säbäp bar. Qayberäwlär, Gazprom üz klientların qänägätländerä almıy, anıñ kiräk bulğan gaznı citeşterep cibärü köçe citmi, dip şiklänä başladı. Ägär dä alar törkmän yäki azäri ğazınıñ ber öleşen üzläreneke itä ala ikän – alar Rusiä ğazına ğına ışanmıyça, bu mömkinlekne qullanaçaq,” dide Milandağı belgeç Federiko Bordonaro.

Medvedev ber nindi dä kileşügä qul quymadı, alay da anıñ belän bergä barğan ere şirkät başlıqları säfärneñ uñışı turında belderde.

Baqıda prezident belän bergä Gazprom başlığı Aleksey Miller da bar ide. Ber ay elek Miller Azärbaycannan böten gaznı bazar bäyäsenä satıp alıp anı Rusiä aşa quarğa täqdim yasadı. Täqdim äle dä köçendä qala, Baqıdan cawap kötälär. Miller isä, jurnalistlarğa “Gazprom häm Azärbaycan azäri gazın satıp alu turında söyläşülär başlıy” dip belderde.

Ämma Azärbaycan gaz satu ölkäsendä Rusiäsez dä eşläp bulğanın belä. 1993 yılda Baqı-Tiflis-Cäyhan neft ütkärgeçe proyıqtını qul quyıp, Baqı Kaspiy töbägenä Rusiäne uratıp ütü yulların kürsätte.

Törkmänstanda söyläşülär tınıç häm törkmän qunaqçıllığına xas – “qunaqlarnıñ xäteren qaldırmaw” räweşendä uzdı. Rusiä prezidentınıñ yärdämçese Sergey Prixodko, törkmännär ber tapqır da Nabukko proyektı turında süz quzğatmadı, dip belderde. Nabukko – Gazprom proytktlarına köndäş bulğan Yevropa Berlege täqdime. Tözeleşne Qıtay finanslıy, proyekt tormışqa aşsa – törkmän gazı Qıtaynıñ könbatışına quılaçaq.

Medvedev Baqı, Aşğabad häm Astanada Rusiä, döresräge Gazprom belän eşläwneñ faydası turında söyläde. Yağulıq säyäsäte belgeçe Bordonaro däwam itä:

“Ägär dä Gazprom azäri häm törkmän ğazın kübräk alsa, ul anı kübräk sata da alaçaq. Häm bu – Trans-Kaspiy häm Nabukko kebek proyektlar yanında tağın ber mömkinlek bulır ide”, di belgeç.
XS
SM
MD
LG