Accessibility links

җомга, 9 декабрь 2016, Казан вакыты 18:25

Germania Tışqı eşlär ministrı Frank-Walter Steinmeiernıñ Abxazia öçen äzerlängän tınıçlıq planın qabul itterü tırışlıqları näticäsez tämamlandı.

Älege plannın möhim maddäläre Gruziä häm Rusiä tarafınnan qabul itelmi. Steinmeir säfären Suxumi häm Mäskäwdä tämamlıy.

Germania tışqı eşlär ministrınıñ, Gruziä häm Rusiä arasındağı nizaqnı beterep tiz arada tınıçlıq söyläşülären başlaw öçen kereşkän säfäre däwam itä. Steinmeier taqdim itkän tınıçlıq planınıñ iñ möhim maddäse: 1990 yılda başlağan suğış waqıtında öylärennän kitärgä mäcbur bulğan 250 meñ keşene kire yortlarına qaytaru häm töbäktä köç qullanunı tuqtatu.

Rusiä tışqı eşlär ministrı Sergey Lavrovnıñ kiçä bu taqdimne kire qağuına qarşı bügen Gruziä başlığı bolay cäwap qaytardı:

“Bu säyäsi ber belderü häm ul bik borçu oyata. Rusiä tışqı eşlär ministrı öylärennän kitärgä mäcbur bulğan keşelärne kire qaytaru fikerenä qarşı çığıun belderde. Bu Yewropanın alarnı qaytaru basımına ber cäwap ide. Min dä moña qarşı äytäm, öylärennän kitkän xalıq Abxaziaga kire qaytaçaq. Häm bez bu maqsatıbızğa xalıqara cämäğatçelek yärdämendä ireşäçäkbez. Bu qararğa ber nindi ilnen dä qarşı çığarğa xaqı yuq, bigräk tä Mäskäwneñ”

Şulay uq Saakaşvili Rusiäne xezmättäş il bularaq kürülären äytte. Läkin ul moña qaramastan Rusiä däwlät kanallarnıñ Gruziägä qarşı ğayeplär taşlanwın da iskä alıp ütte.

Steinmeir, (Britania, Fransia, Almania, Rusia häm AQŞtan torğan) BMOğa dus illär törkemen citäkle. Bu törkem Abxaziadağı kiyerenkelekne çişärgä teli. Steinmeier älege 3 könlek säfäre barışında barlıq taraflarnı ziärät itep urtaq tel tabarğa omtıla.
Steinmeier planında:

· 1992-93 yıllarında başlağan suğış waqıtında öylärennän kitärgä mäcbur bulğan xalıqnı kire qaytaru
· Köç qullanunı räsmi töstä tuqtatu öçen kileşü tüzü
· Abxazia töbägendäge räsmi belgesezlekne taratıp töbäkne yañadan tüzekländerü öçen ozın waqıtlı maqsatlar quyu küz aldında totıla.

Bügen Steinmeier Abxaziadağı seperatistlär belän söyläşkännän soñ Rusiäle räsmilär belän söyläşer öçen Mäskäwgä oça.

Gruziä yağı isä töbäktä köç qullanunı tıyu taqdime belän kileşme. Çönki Gruziä köç qullanu xoquqı betkän oçraqta ul Abxazianıñ üz bäysezlegen qulına aluınnan qurqa.

Saakaşvili töbäktä atışların tuqtatu kileşüe buluın äytte. Şunlıqtan Tiflisnen köç qullanu kebek maqsatı bulmayaçağına basım yasıy Saakaşvili.

“Bez üzebezne saqlaw öçen tanklar, oçqıçlar yäisä raketalar qullanmibız. Bezgä yanağan qurqıtularğa qarşı bolar belän cäwap birä almıybız. Häm bu oçraqta äle bez ilebezne saqlaw öçen dä nindi çaralar kürergä tiyeşlegebez turında da uylanırğa tiyeşbez. Bezneñ ilne saqlaw öçen iñ zur qoralıbız – demokratia . Beznen däwlätebez demokratik. Xäzer Gruziänen bu küreneşen qarağa buyaw öçen tırışlıqlar bar läkin minem uylawımça monın öçen inde soñ”

İkençe yaqtan Abxazia başlığı Sergey Bagapş Steinmeier belän söyläşüennän soñ yasağan belderüendä, plannı qarap çığu turında niätebezdä yuq, çönki Abxazia bäysez ber däwlät dip belderde.
XS
SM
MD
LG