Accessibility links

дүшәмбе, 5 декабрь 2016, Казан вакыты 07:35

II Dönya suğışınnan soñ Yewropada bulğan iñ qanlı häm küpläp üterüne oyıştırğan serb başlığı Karadzic, 13 yıldan soñ nihayät tabıldı.

Düşämbe könne qulğa alınuı xäbär itelgän Bosnialı serb başlığı Radovan Karadciç, ozaqlamıy Haguetağı suğış cinäyätläre mäxkämäsenä cibäreläçäk.

Radovan Karadciç, Yewropada Holokosttan soñ küpläp üterüne oyıştırğan, meñlägän keşeneñ tormışın özgän suğış citäkçese. 13 yıldan berle suğış cinayätçese bularaq ezlängän Karadciç düşämbe könne kiç belän qulğa alındı.

Karadzic xäzer qılğan qanlı zolmnarı öçen xalıqara mäxkämä aldında cäwap totaçaq.

Mäğlümatlarğa qarağanda Karadciç 13 yıl buyı bütän isem familia häm dokumentlar belän Belgradda yäşägän bulgan
Serbia prezidentı Boris Tadic kiçä tönlä yasağan belderüendä 63 yäşlek Karadciçneñ yäşerengän cirennän tabıp anı qulğa aluların äytte.

Karadciçneñ qulğa alınu xäbäre taraluğa, Bosnia başqalası Sarajevoda xalıq uramnarğa çığıp älege waqıyğanı bäyräm itte. Bilgele bulğança Sarajevo 1992-96 yıllarıında Karadzic citäklegendäge serb köçlär tarafınnan basıp alınğan ide. 43 ay däwam itkän suğış waqıtında meñlägän keşe üterelgän, Yewropadağı iñ qanlı zolımnar Bosniada qılınğan ide.

Karadzic Haguedağı xalıqara cinäyätçelek mäxkämäse tarafınnan ike tapqır suğış cinayätçelegendä ğayeplände. Karadciç Sarajevonı basıp alğanda 12 meñ gönahsız keşeneñ ğömeren özde. Häm ul monnañ qala 1995 yılda Serebenicada 8 meñ möselmannı küpläp üterüne oyıştıruda ğayeplänä.

Karadciçneñ qulğa alınuı turında belderü yasağan räsmilär anıñ kiçä Belgrad şähärendä avtobusqa utırğanda qulğa alınuın belderde. Mäğlümatlarğa qarağanda Karadciç 13 yıl buyı bütän isem familia häm dokumentlar belän üzennen kem buluın yäşerep yäşägän. Tanılmaw öçen saqal üstergän Karadciç, Yaña Belgrad bistäsendä alternativ medisina üzägendä eşlägän.

Bu turıda xalıqara suğış cinayätlege mäxkämäse belän xezmättäşlektä cäwaplı Serb ministrı Rasim Ljajic söyläde:

"Karadciç, Dragan Dabic isemen qullanıp şul isemdä yalğan dokument häm passportlar belän tabıldı. Karadciç Serbia watandaşı tügel, häm ul kem buluın yäşerä alğan. Ul yäşär öçen alternativ medisina üzägendä eşlägän, häm ul yaña Belgrad bistäsendä yäşägän bulğan”

Yalğan dokumentlar belän bergä qulğa alınğannan soñ Karadciç, Haguetağı xalıqara mäxkämäse kileşüenä kürä tözelgän Belgradtağı suğış cinayätçelege mäxkämäsenä cibärelgän.

Mäxkämä räsmiläre Karadzicneñ qulğa alınuı, Serbianıñ Yewropa berlege şart quşqan suğış cinäyätçelären Haguega tapşıru talabenä tuğrılıqlı buluınıñ ber işaräse buluın äytte.

Karadciçneñ qulğa alınuı bügen Yewropa Berlegeneñ Brusseldä Serbianıñ berlekkä quşıluı mäsäläsen söyläşü cıyını waqıtına turı kilä.

Yewropa berlege cıyını öçen Brusselgä barğan Serbia tışqı eşlär ministrı matbuğat aldında yasağan çığışında älege basım yasap bolay dide:

“Bez üzebezneñ Yewropa Berlegendäge kiläçägebez turında bik citdi qayğırtabız. Häm bez monı kiçä kürsättek. Bez Yewropa Berlegenä äğza bulırğa telibez. Häm bez töbäktäge tınıçlıq häm totrıqlıqnı saqlawda möhim rol uynarğa telibez”

Karadciçneñ qulğa alınuı şulay uq, 8 möselman Bosnialınıñ küpläp üterelgän Serebenica faciğaseneñ 13 yıllığına da turı kilä.
XS
SM
MD
LG