Accessibility links

чәршәмбе, 7 декабрь 2016, Казан вакыты 21:25

Yillar buyı qaçıp yörgän häm nihayät xalıqara mäxkämä qarşına basqan Radovan Karadciç, utırışnıñ berençe könendä ük "miña amerikannar ezärlekläwne tuqtatu xaqında wäğdä birgän ide", dip belderde.

Anıñ süzlärençä, bu wäğdäne aña Richard Holbrooke birgän bulğan.
Azatlıq radiosındağı yugoslav redaksiäseneñ elekkege citäkçese, ä aña qädär Sarayevoda Bosniä televideniäse mödire bulıp eşlägän Nenad Pejiç üzeneñ şul eşendä Radovan Karadciç belän bulğan ber oçraqnı iskä töşerä.

Televideniädä uzğan ber tapşıru barışında Karadciç Bosniä şähärläreneñ bersendä möselmannarnıñ kürşedä yäşägän ber serb ğailäsen torğan cirennän quıp cibärüe xaqında belderä. Şunda uq ul şähärneñ dä, uramnıñ da isemen äytä, yort wä fatir sanın kiterä, xätta serblarnıñ tögäl isemen dä isenä töşerä.

Beraz soñraq televideniä cibärgän törkem andıy adresnıñ häm andıy ğailäneñ çınnan da buluın, yäğni Karadciç kitergän faktik mäğlümätneñ döreslegen açıqlıy. Ämma ber mäs'älädä anıñ yalğan söyläwe bilgele bula - Karadciç quılğan dip qotqı taratqan serb ğailäse haman da şunda üzeneñ möselman kürşeläre belän yäşäp yata bulıp çığa.

Ämma üzeneñ şuşı keçkenä yalğanı belän Karadciç inde eşen eşli - serblarnıñ möselmannarğa qarata näfräten tağın da arttıra. Monıñ öçen asılda bernindi nigez bulmasa da.

Radovan Karadciçneñ Haag mäxkämäse qarşında yasağan çirattağı belderüe dä şundıy yalğannar rätennän tügelder dip hiç äytep bulmıy. Şuşı süzläre belän ul bar iğtibarnı üze qılğan wäxşättän, suğış cinayätlärennän çitkä borıp, anı amerikannar Karadciçkä wäğdä birgänme, yuqmı digän bäxäskä yünältä.

Karadciç süzlärenä qarağanda, 1996 yılda Bosniä suğışın tuqtatuğa kitergän Dayton kileşülären äzerlägändä, bu eşne alıp barğan Richard Holbrooke, Quşma Ştatlarnıñ Balkandağı maxsus wäkile, Bosniä serbları citäkçesenä garantiälär birgän bulğan.

Yänäse, ägär dä ul säyäsättän kitep, Daytonğa qarşı toruın tuqtata ikän, Washington da anı mäxkämägä tartunı, yäisä başqaça ezärlekläwne tuqtata ala.

Richard Holbrooke 1996 yilda Sarayevoda
Karadciçneñ şuşı däğwasına Richard Holbrooke, "bu çep-çi yalğan, min andıy alış-bireşkä berqayçan da barmas idem, çönki bu äxlaqi ber ğämäl bulmas ide", dip belderde.

Radovan Karadciçkä qarşı xäzer Bosniä suğışı waqıtında serb bulmağan milli törkemnärgä qarata genotsid qılu, genotsid qıluğa bulışu, keşeçelekkä qarşı cinayätlär qılu häm suğış cinayätläre qılu ğäyepläwläre çığarıla.

Mäxkämäneñ berençe utırışında aña şuşı ğäyepläwlär citkerelde, xäzer anıñ alarnı qabul itü, yä kire qağuı öçen 30 köne bar, çirattağı utırış şulay itep augustnıñ 29-ına bilgelängän.
XS
SM
MD
LG