Accessibility links

якшәмбе, 11 декабрь 2016, Казан вакыты 03:28

Zur 7lek iqtisadi krizis belän köräşergä wağdä itte


Waşiñton - Dönyanıñ iqtisadta aldıngı 7 ilneñ iqtisad ministrları dönyada taralgan iqtisadi kiyerenlek mäsäläsen söyläşü öçen AQŞ başqalasında bergä oçraştı.

Zur 7lektäge illär Waşiñtonda kredi bazarınıñ sulış aluı öçen 5 maddädän torgan plan belän kileşte.

Älege plan, zur banklarnı häm iqtisadi qorılmalarnı saqlap qaluga häm alarnıñ törle çıganaqlardan kapital österüen garantia astına alunı maqsat quya.

Global resessia dulqınınnan soñ artqan borçılu, kürelgän törle çaralarga qaramastan, kiçä Azia, Yewropa häm AQŞ birjasında xissä qagäzläreneñ töşüenä kitergän ide.

AQŞ, Yaponia, Britania, Germania, Fransiä, İtalia häm Kanadadan torgan Zur 7lekneñ Waşiñtonda uzgan cıyınınnan qala, Xalıqara aqça fondı İMF häm Dönya bankı bu atna axırında krizis mäsäläsendä bergä cıyıla.

Zur 7lekneñ Eurozona töbägendäge illär citäkçeläre, irtägä Fransiä başqalası Parijdä bergä oçraşırga cıyına.

Kiçä uzgan Zur 7lek sammitınnan soñ AQŞ däwlät qaznası başlıgı Henry Paulson, sammitta qatnaşqan illärneñ iqtisadi krizis qarşında nindi çaralar küreläse mäsäläsendä urtaq qararga ireşülären häm iqtisadi totrıqlıqnı saqlap qalu öçen bergä xezmättäşlekne däwam itterüen äytte.

Henry Paulson, xökümätlärneñ aqça äyläneşen tämin itüläre kiyerenkelekne çişü öçen bik kiräkle häm möhim çara dip belderde.

XS
SM
MD
LG