Accessibility links

якшәмбе, 4 декабрь 2016, Казан вакыты 21:35

AQŞtagı prezident saylawına ber atna waqıt qalıp bara - tawış birü anda noyäbrneñ 4-endä uzaçaq. Bıyılğı saylawaldı kampaniäse qızıqlı, kötelmägän waqiğälärgä bay.

Quşma Ştatlardağı säyäsi tormışnıñ nigezdä ike partiä - respublikan häm demokratlarnıñ üzara yarışıp yäşäwenä qorıluı mäğlüm fakt.

Ämma ägär dä sez bar respublikannar da alda torğan saylawda barı tik üz nämzäte - McCain öçen genä tawış birergä cıyına dip uylasağız, yalğışasız. 71 yäşlek Carlos Campbell oçrağında bu hiç alay tügel.

Respublikan prezident Ronald Reagan xökümätendä säwdä sekretare yardämçese bulğan, yıllar däwamında törle respublikan nämzätlärenä kiñäşlär birep torıp torğan Campbell kiläse atnada üz tawışın McCainğa tügel, ä demokrat Barack Obamağa biräçäk.

Anıñ kebeklär şaqtıy bulırğa oşap tora, Obamanı yaqlawçı respublikannar fenomenı yıl däwamında nığıp qına kilde. Qayberäwlär monı şulay uq zamanında respublikan prezidentı bulğan general Eisenhowernıñ onığı, tatar kilene Susan Eisenhower başlap cibärde dip isäpli. Fivral başında näq menä ul, respublikan partiäse äğzası buluğa qaramastan saylawda Barack Obamanı yaqlawın beldergän ide. Susan kürenekle tatar ğalime Roald Säğdievneñ cämäğäte bulıp tora.

Şunnan soñ Obamanı yaqlawçı kürenekle respublikannar sanı arttı ğına, alar öçen xätta Obamocon, yäğni Obamanı üz kürgän konservatorlar digän isem dä uylap taptılar. Aralarında inde xäzer elekke senatorlarnı, xökümät äğzaların da kürep bula. Misal öçen, elekke däwlät sekretare Colin Powell, prezidentlar Bush, Reagan, Ford häm Nixon çorında saqlanu ministrlığında eşlägän Ken Adelman.

Respublikan Powell demokrat Barack Obamanı ilne berläşterä alırlıq ber küçeş çorı ähele dip atıy. Adelmanğa isä McCainneñ iqtisadi krizis qupqan çorda säyer eş itüe oşamıy. Alar ikese dä östäwenä McCainneñ vitse-prezident itep Alaska gubernatorı Sarah Palinne saylawın yaratmıy.

Ä inde elegräk telgä alınğan Carlos Campbell küñelenä, ayırım alğanda, respublikan nämzeteneñ üz kampaniäsen tarqaw alıp baruı yatmıy, Obama monı küpkä ruxlandırğıç, canlıraq itep ala barı, di Campbell.

"Senator Obamanıñ kampaniäse şuşı böyek millät yäşlärendä nindider cawap taptı, anıñ xisläre bezneñ barıbıznı da çolğap ala. Obama kampaniäse küçeş tä, kütärgeç tä, eçtälek tä bulğan ber cıyılma bulıp tora", di 71 yäşlek respublikan Carlos Campbell.

Amerika Quşma Ştatlarınıñ yaña prezidentı kiläse sişämbedä, noyäbrneñ 4-endä saylanaçaq.
XS
SM
MD
LG