Accessibility links

сишәмбе, 6 декабрь 2016, Казан вакыты 15:07

Çexia parlamentı Äfğanstandağı xärbilären qaytarırga qarar qıldı


Praga – AQŞ xaqimiäte xärbilären arttırgan da, Çexia parlamentı Äfğanstandağı ğaskärilären ilgä kire qaytarırğa qarar qıldı. Ä AQŞ citäkçelegendäge Äfğanstan köçlärendä yuğaltular arta bara.

Äfğanstannıñ Hälmand wilayätendä, xärbi maşinada barğan 3 Dania xärbiye yul qırıyında urnaştırılğan şarlatqıçqa elägep hälaq buldı.

Dania premyer ministrı Anders Foğ Rasmussen älege waqıygağa qarata yasağan çığışında anı Danianıñ Äfğanstandağı iñ zur yuğaltuı bularaq atadı. Danianıñ Äfğanstandağı NATO köçläre arasında 700 xärbiye bar.

Pragada isä, Äfğanstandağı Çex xärbiläreneñ möddäten ozınaytu taqdime parlament tarafınnan kire qağıldı.

Çexia premyer Ministrı Mirtek Topolanek, parlament qararın “oyat” dip bäyäläde. Premyer konstitusiänen üzenä birgän xoquqqa nigezlänep xärbilärneñ qaytu waqıtın 60 köngä kiçekteräçägen belderde.

Çexianıñ Äfğanstandağı NATO köçlärendä 400 xärbiye bar. 100 xärbiye isä äl Qaidä häm Taliban kebek suğışçılarğa qarşı köräşkän AQŞ köçlärenä yardäm itä. Xärbilärneñ Äfğanstandağı möddäte 31 dekäbrdä tämamlana.

AQŞ saqlanu ministrı Robert Gates kiläse yıl Äfganstanğa östämä bularaq yaqınça 3,000 xärbi cibärü turındağı qararnı xupladı.




XS
SM
MD
LG