Accessibility links

Кайнар хәбәр

Törkiädä yañadan köçle dulqın krizisı


Ankarada citdi ber säyäsi krizis qabınu ixtimalı bar. Ämma bügenge ekonomik şartlardaTörkiäneñ krizis kütärerlek xäle yuq.

7 ğıynwarda isemen törek legendasınnan alğan "Ergenekon" däğwası buyınça barğan tikşerenü çaralarında tağın 40-lap keşe saq astına alındı. Alar arasında: pensiädäge ike armia generalı, ber general leytenant, bügenge köndä armiadä xezmät itüçe altı-cide ofiser, elekke yuğarı uqu oyışması citäkçese häm ataqlı ber professornıñ buluı küplärne şaqqatırdı.

"Ergenekon" tikşerenüläre nigezendä küz sağı astına alınğan häm mäxkämä utırışın kötkännär xökümätne bärep töşerü maqsatı belän terror oyışması buldıruda gäyeplänä. Yıl yarım waqıt eçendä yözdän artıq keşe saq astına alınıp, xökem itelde, ikençelär mäxkämä qararın kötä. Qulğa alınuçı şäxeslär arasında pensiädäge generallar, yuğarı uqu rektorı, unlap akademik, säyäsätçelär, jurnalistlar, elekke polisia xezmätkärläre, advokatlar, eşquarlar, başlıça “Kuva-i milli” oyışması äğzaları häm başqalar bar.

7 ğıynwarda Törkiä polisiase xökümät tüntäreleşe äzerläw eşen tikşerü barışında totqarlanğan 40-lap keşene arasında tübändägelär iğtibarğa layıq: pensiädäge armia generalı, milli qurqınıçsızlıq şurası general' sekretare Tuncer Kılınç, layıqlı yaldağı ikençe armia generalı Kemal Yavuz, 8 yıl tiräsäse yuğarı uqu oyışması belän citäkçelek itkän professor Kemal Gürüz, ataqlı sosialist häm soñğı yıllarda telewideniedä tapşırular yasap danı üskän professor Yalçın Küçük.

Bolarğa östälep elekke İstanbul merı, unlağan urta mäktäp häm Yeditepe universitetı xucası Bedrettin Dalan da saq astına alınırğa tieş bulsa da, ul AQŞ-ta bulu säbäple monnan qotıldı. Tik polisia anıñ eş urınında tentü ütkärde häm keçe ulın saq astına aldı.

Bügengä qädär saq astına alınğannarnıñ qayberseneñ öylärendä qorallar da tabıldı. Saq astına alınğannar häm xökemgä tartılğannarnıñ barsı da "Ergenekon" terror oyışmasında äğza buluda gäyeplänsä dä, alarnıñ qayberläre üzläre belän bergä gäyeplägän keşelärne tanımawların äytä.

Ğömümän alğanda, bälki gäyeplänüçelärneñ urtaq yağı hämmäseneñ dä AK partia xakimiatenä qarşı bulularıdır. Şul säbäple, bu protsess yüridikmı, yäisä säyäsime digän şik tua.

Äytergä kiräk, saqqa alınğannarnıñ barsı da diärlek Törkiädä tanılğan keşelär buluı iğtibarnı cälep itä. 7 ğıynwarda Törkiäneñ elekke baş prokurorı Sabih Kanadoğlunıñ öyen tentüe, ustisia orğannarınıñ üz xezmätkärlärenä dä basım yasıy digän şik tudıra.

Soñğı saq astına alular citdi tınğısızlıq xasil itte. Generalştabta şul uq könne barlıq yuğarı däräcäge xärbilär kinät cıyılıp, altı säğät yabıq işeklär artında söyläşte. Şunnan soñ, här atna sayın generalştabnıñ matbuğat xezmätkärläre belän bula torğan oçraşunıñ ütkärelmäyäçäge iğlan itelde.

8 ğıynwarda isä generalştab başlığı armia generalı İlker Başbuğ kinät premer Recep Tayip Erdoğan belän oçraştı. Şul arada isä eçke eşlär ministrı Beşir Atalay prezident Gül yanına çıqtı. Ber ük waqıtta oppozisiadäge Cömhüriät Xalıq Partiase (CHP) liderı Baykal, AK partiane “üç alu operasiase oyıştıruda” gäyepläde. Moña isä AK partia süzçese: “CHP-se “Ergenekon” virusına sabışudanmı tınıçsızlana” dip cawap qaytardı. Küp tä ütmäde CHP AK partiane faşizmğa baruda gäyeplägän belderü yasadı.

Bolar barsı da Anqarada citdi ber säyäsi krizis qabınu ixtimalına işarä itä. Ä Törkiäneñ bügenge ekonomik şartlarda krizis kütärerlek xäle yuq.
XS
SM
MD
LG