Accessibility links

дүшәмбе, 5 декабрь 2016, Казан вакыты 03:31

Törkiädä massaküläm mäğlümat çaralarında Barak Obamanıñ AQŞ-nıñ 44-nçe prezidentı bularaq ant itü yolasına zur ähämiät birdelär.

18 ğinwarda NTV televidenie kanalı Vaşingtonda Obama qatnaşqan konsertnı turıdan-turı tapşırdı. 20 ğinwar könne isä ant itü yolası barlıq kanallarda berençe xäbär buldı. 21-ndä dönya kürgän gazeta bitlärendä dä şuşı yolağa häm Obamanıñ prezidentlığına bäyä birgän mäqälälär urın alğan.

Dönyanıñ küp kenä illäre kebek Törkiädä dä Buş çorınıñ tämamlanuına qänäğätlelek häm AQŞ-nıñ berençe qara tänle prezidentınnan küpne ömet itelüe kürenep tora.

Äytik, “Hürriyät”neñ berençe bitendä “Obama çorında ömetebez” dip atalğan mäqälä urın alğan. Monda ilgä yaña prezident kilgännän soñ AQŞ-ta köteläçäk üzgäreşlär turında süz bara.

Gazetalarnıñ qayberläre AQŞ tarixında berençe märtäbä qara tänle keşeneñ prezident buluına ähämiät birgän yazmalar urnaştırılğan.

Äytik, “Bugen”gazetasında “Yaña dönya - yaña prezident, “Günäş”tä “Tarix almaşqan moment”, “Türkiyä ” basmasında “Obama AQŞ-nıñ yaña xucası”, “Ävränsäl”da “Qara prezidenttan aq keşe antı” häm başqa şundıy ruxtağı yazmalar urın aldı.

Gazetalarnıñ ber öleşe isä Obamanıñ ant itü yolasında yasağan çığışına kübräk iğtibar birgän. Äytik, “Cumhuriyät ” gazetasında “AQŞ-ta yaña çor, “Vatan”da “Möselmannarğa tarixi çaqıru”, “Zaman” basmasında “Obamadan ömet tudırırlıq başlanğıç” digän mäqälälär belän Obamanıñ dönya xalıqlarına, ayırım alğanda, möselmannarğa yasağan möräcäğätenä basım yasadı.

“Milliyät” gazetası isä “Berençe könnän ük tığız eşçänlek” digän mäqälä belän prezident Obamanıñ berençe eşe bularaq Ğuantanamo totqınnarı östennän barğan xökem protsessların tuqtatu turındağı räsmi kürsätmäsenä iğtibar itkän.

“Bugen” gazetası Obamanıñ ant itü yolasına zur urın birgän gazetalarnıñ berse. Gazetada bu yolanıñ 1861 yıldan birle İncilgä qul quyıp ant itelüen, tantanada Obamanı täqdim itkändä anıñ ikençe - Xösäyen iseme äytelmäwenä, läkin ant itkändä bulaçaq prezident üzen “min Barak Xösäyen Obama” dip tanıştıruına iğtibar itä.

Ul üzeneñ çığışında Könbatıştağı citäkçelärgä töbäp: “Onıtmağız, xalıqlarığız sezne cimergännäregez belän tügel, ä tözegännäregez belän iskä alaçaqlardır”, dip tä äytte dip yaza gazeta.

Obamanıñ AQŞ prezidentı itep bilgelänüenä törek jurnalistları törleçä bäyä birde. Şularnıñ berse “Xörriät” gazetası xäbärçese Doğan Uluç. Ul “Obama buş bulıp çıqsa?” isemle mäqäläsendä bolay dip yaza:

“Barak Obama siräk oçrıy torğan söyläw köçenä iä ber säyäsätçe. Süzläre bik tä'sirle. Qaralar ğına tügel, aqlar da añarğa xäyran qala. Awıl cirlärendä, zur şähärlärdä ütkärgän saylaw aldı kampaniäläre waqıtında anı tıñlağannarnıñ küzlärennän yäşlär kilüen ekran aşa kürgänem bar. Qara tänlelär häm ber öleş aq tänlelär ilneñ problemaların moğciza aşa çişeläçäk dip ışana. Däwlättä täcribäse bar dip äytep bulmıy. Bügengä xätle anıñ ber uñışın belgän keşe yuq. Ä AQŞ kebek il belän citäkçelek itü ciñel tügel. Ägär 44-nçe prezident buş bulıp çıqsa?”, dip yaza Uluç Doğan.

Yaña AQŞ prezidentı Barak Xösäyen Obamadan üz xalqı ğına tügel, baytaq illär häm xalıqlar da küp närsälär kötä, ämma Obama süzlärenä qarağanda, üzgäreşlär bügennän irtägä bulmayaçaq.

XS
SM
MD
LG