Accessibility links

дүшәмбе, 5 декабрь 2016, Казан вакыты 07:28

20 mart könne Törkiäneñ finans ministrlığı soñğı ike ayda budjetta 10 milliard 359 million lira, yäğni yaqınça 6 milliard dollar defisit buldı dip iğlan itte.

Şulay itep, xökümätneñ 2009 yıl azağında defitsit miqdarı turındağı farazı xäzerdän ük tulğan buldı.

Törkiä xökümäte, iqtisadi krizis bik qurqınıç tügel, dip xalıqnı tınıçlandırırğa tırışa. Läkin çınbarlıqta bu alay tügel. Xökümätne añlap ta bula, çönki 8 könnän soñ cirle saylawlar ütkäreläçäk. Monda zur häm keçknenä şähär merları, şähär mäclese äğzaları, rayon citäkçeläre saylanaçaq.

Säyäsi partialärneñ citäkçeläre isä härkön sayın diyärlek zur mitinglar ütkärä. Bıyılğı cirle saylaw aldı kampanialäre parlament saylawı kebek bik qızu bara.

Xakimiattäge AK partia bu cirle saylawlarda da, ütkän yıldağı parlament saylawındağı kebek, saylawçılarnıñ 47 yäki annan da yuğarıraq prosent tawışına ireşmäkçe. Menä ul çaqta anıñ xakimiate qabat raslanğan bulaçaq. Läkin ildäge iqtisadi krizis AK partianeñ şuşı maqsatına ireşüenä kirtä bulaçaq kebek.

Şunıñ öçen dä xökümät qayber iqtisadi çaralar kürä başladı. Berençedän, ekonomik qıyınlıqlarğa duçar bulğan predpriatiälärdä eşçelärgä xezmät xaqınnıñ ber öleşen tülärgä wäğdä itte. Annarı soñğı atnada yaña automaşina, suıtqıç, ker yuu maşinası kebek cihazlar satıp alğannarğa salımnı kimette. Ämma bu çaralarnıñ ällä ni täsire bulmayaçaq kebek. Çönki bu towarlarnı aqçası bulğannar qabat bäyälär artqançı alıp qalırğa tırışa.

Zapçast industriase eksportçılar berlege citäkçese Ferit Sünneli, monıñ produksia belän eşsezlekkä faydası bulmayaçaq, dip belderde.

İñ soñğı statistik mäğlümatlarğa qarağanda, 3 million 300 meñ keşe eşsez. Qayber ekonomistlar räsmi räweştä terkälmägän eşçelär belän bu san 5 million dilär. “Radikal” gazetada iqtisadçı Uğur Gürses süzlärenä qarağanda, Törkiädä 15 yäştän uzğan xalıq sanı yaqınça 50 million. Alar arasında 12 millon tiräse öydäge xatın-qızlar, 3,5 millionnan artığı uquçılar, 3 million pensionerlar, 3 millionnan artıq isä ğäriplär ikän. Dimäk, 50 millionnıñ 26 millionı eşlämi.

Däwlät qaznası ministrı Mehmet Şimşek: “Krizis waqıtlarında kübräk keşe eş ezli, bigräk tä xaqın-qızlar eşkä urnaşırğa teli, bu da eşsezlär sanın üsterä”, digän süze säyer toyıldı.

Törkiä premer-ministrı Erdoğan: “Saylaw aldı kampaniasendä eş birüçelärgä keşelärne eştän çığarmasqa quştıq. Ägär dä çığarsağız, monıñ xisabın tülärsez”, dip kisätte.

Şulay itep iqtisadi krizis AK partia tawışlarına tiskäre yoğıntı yasarğa ixtimal bulğanlıqtan, xökümät propağanda öçen küp köç sala.

Krizisnıñ başqa ber kürsätkeçe isä, banklardağı kredit burıçlarınıñ 36 milliard lirağa, yäğni 21 milliard dollarğa citüe. Şul uñaydan 1 million 564 meñ keşegä cinayät eşe başlanğan. Alarnıñ toraqları, öy cihazları, automaşinaları qullarınnan tartıp alınaçaq, burıçların qaplıy almasalar törmägä yabılaçaqlar.

XS
SM
MD
LG