Accessibility links

Ärmän-Törek mönäsäbätläre yaxşıramı?


Soñğı yıllarda Törkiä belän Ärmänstan arasında mönäsäbätlär şaqtıy üzgärde. Moña östäp xäzer 1993 yılda yabılğan çiklärneñ yañadan açıluı ixtimal.

İke il arasında mönäsäbätlär häm soñğı üzgäreşlär turında Yırawandağı cirle häm xalıqara ärmän üzäge belgeçe Richard Giragosiyan belän äñgämä täqdim itäbez.

-Sez Anqara belän Yerevan arasında kileşü bulaçağına ışanğan belgeçlär rätendä häm sezneñ farazlarğa quşılğan belgeçlär sanı könnä-kön arta. Monıñ säbäbe närsädä?

Richard Giragosian
-Bez ike yaqnıñ da adımnarın kiñ dairädä küzätäbez. Soñğı waqıtta ike taraf ber-bersenä bik yaqınaydı, alar xätta tarixi ber kileşü buldıra alaçaq dip uylıym. Bu adımnı Rusiä belän başqa illär dä xuplıy. Äytergä kiräk, bu üzgäreştän 6-7 äprel könnärendä Törkiäne ziärät itäçäk Amerikanıñ yaña prezidentı Barak Obama da qänäğät. İke arada aylar buyına barğan söyläşülär ike ilne kileşü çatına kiterde.

-Kileşu digännän, ike il arasında ozaq yıllar nizag tudırğan ärmän ginosidı mäsäläse bar. Ärmännärneñ xäter köne yaqınayğanda (24 äprel) Obamanıñ ärmän genotsidın kongressta tanıtu öçen birğan süzen ütiäçäk digän ömet tä bar. Küzlär bu köngä töbälgändä ike il arasındağı kileşü qayçan qabul iteler?

-Kileşü 16 äprelda Yerevända uzaçaq Qara diñgez iqtisad sammitı waqıtında imzalanır dip kötelä. Gärçä, törek mäğlümat çaralarında ärmän genosidı tanılğan oçraqta, kilüşudän baş tartılaçağı turında işarälär kürensä dä, 16 äpreldä kileşüdän baş tartu bulmas dip ışanam. Bu oçraqta bälki anı 24 äprelgä kiçekterü mömkin bulır. Ul çaqta Törkiä 24 äprel belderüendä ärmän genotsidın tanudan baş tartu öçen Törkiä Aq Yortqa basımnarın arttırırğa mömkin.

-Kileşüneñ eçtälege turında mäğlümat barmı, nindi adımnar qaralğan?

-Başta Törkiä-Ärmänstan arasındağı çikne açu turında süz bara, annan soñ diplomatík bäyläneşne Törkiäneñ Gruziä ilçelege aşa däwam itterü qarala. Şulay uq ike il arasında nizağ tudırğan ärmän genotsidı kebek qarşılıqlarnı çişü öçen urtaq komissia tözü küz aldında totıla. Monnan qala töbäktä mönäsäbätlärne tuñdırğan Qarabax nizağın xäl itü öçen küp taraflı xalıqara törkemnär yärdämendä yaña plan yul xarítası çağarılaçaq.

-Törkiä häm Ärmänstanda bu kileşügä qarşı çıqqan keşelär sanı küpme, keşelär niçek qabul itä?

-Kileşü räsmi bularaq iğlan itelgännän soñ, cämäğätçelek törle qarşılıq tudıraçaq.

Törkiä oçrağında millätçelär kileşügä qarşı çığuı ixtimal. Ärmänstanda isä xökümät il säyäsätenä zur täesir itkän häm genosidnı tanıtu mäsäläsendä iñ äwzem rol' uynağan diasporanı künderergä mäcbür bulaçaq.
XS
SM
MD
LG