Accessibility links

пәнҗешәмбе, 8 декабрь 2016, Казан вакыты 09:12

Törkiädä terror arta


Soñğı ber-ike atnada Törkiädä terror waqiğaları yäki terror belän bäyle xäbärlär xalıqta tıñğısızlıq uyattı. Monıñ täsire isä tormışnıñ törle tarmaqlarında üzen sizderä.

Bu atnada Törkiädä här kön sayın diyärlek terror yäki terror belän bäyle xäbärlär taraldı.

Mäğlüm bulğança, berniçä aydan birle “Ergenekon” terror oyışması östennän xökem protsesı bara. Bu oyışmada äğza buluda şiklänelgännär belän xökemgä tartıla başlağannar Törkiädä fetnä buldıruğa nigez saluda gäyeplänälär.

Prokuror şuşı gäyepläw belän bergä aralarında pensiädäge armia generalları, törle däräcädäge ofiserlar, partia citäkçeläre, universitet rektorları, akademiklar, jurnalistlar, törle oyışma citäkçeläre häm “Ergenekon”da äğzalığı bulğan yözlägän keşene küz sağı astına aldı.

Qayberäwläre östennän xökem protsessı başlandı inde. Qayberläre yaña gäyepläw aqtınıñ äzerlänüen kötä. Bu mäsälädä oppozisia belän xökümät, xätta generalştab belän xökümät tä ikegä bülende. Qayberäwlär moña “yasalma protsestlar” digän bäyä birä.

Qarşı buluçılar, Törkiä xärbi fetnädän çaq qına qotıldı. di.

Ütkän atna azağında şuşı “Ergenekon” protsessı qısalarında Yeditepe Universitetı xucası, elekke İstanbul merı Bedreddin Dalannıñ “İstek” fondı urnaşqan Bosfordagı Poyrazköydä tufraqqa kümelgän qoral ezli başlandı. Näticädä granatlar, roketa ırğıtqıçlar häm şartlatqıçlar tabıldı. Dürt ofiser qulğa alındı, läkin alarnıñ barmaq ezläre turı kilmäde. Bädrättin Dalan üze isä AQŞ-ta, ul da gäyeplänüçelär arasında.

27 äprel könne irtänge säğät bişlär tiräsendä isä, televizor qarawçılar polisianeñ İstanbulnıñ Azia öleşendä Bostancı rayonında ber öygä mıltıqlar häm bombalar belän xöcüm itülären kürdelär. Biş säğätkä suzılğan bäreleşlärdän soñ ut açqan terrorçı üterelde. Läkin şul arada ber polisia belän ber ğädi keşe ülde, cide polistiä xezmätkäre cäräxätlände. Matbuğat polisiane buldıqsızlıqta gäyepläde.

Ütkän atnada isä Törkiäneñ törle töbäklärendä PKK belän bäyläneşe buluda şiklänelgän Demoqratik Cämğeyät Partiase äğzaları häm radikal dinçe äl-Qäidä äğzası buluda gäyeplänüçelär qulğa alındı.

28 äpreldä isä elekke Generalştab başlığı, pensiädäge armia generalı Hilmi Özkök İzmirda “Ergenekon” terror oyışmasın gäyepläw qısalarında sorawğa tartıldı. Soraw alu sigez säğätkä suzıldı. Törkiä taríxında berençe märtäbä yuğarı däräcägä ireşkän ber xärbi şäxes siwil prokurorlar tarafınnan sorawğa tartıla. Añardan üz citäkçelege waqıtında generallar arasında xärbi putç oyıştıru tendensialäre soralğan. Çönki elekke Diñgez köçläre qomandirı, pensiädäge admiral Özdenneñ matbuğatta näşer itelgän istäleklärendä bu turıda täfsille mäğlümat bar ide. Gärçä, ul bu istäleklär mineke tügel disä dä, şik-şöbhä däwam itä.

29 äpreldä isä Generalştab başlığı armia generalı İlkär Başbuğ jurnalistlar belän oçraşqanda, Törkiäneñ küpçelek kördlär yäşägän Diyarbakırnıñ Lice belän Genç isemle şose yulınnan ütkän bronítanktağı 9 gäskär PKK quğan minağa bärelep, hälaq buldı digän xäbär taraldı. Diyerbakırdan yıraq tügel Hakkaridä ber xärbi operasiadän qaytqan xärbi bülekkä PKK tarafınnnan açılğan ut näticäsendä isä başqa ber soldat ülde.

Tege yaqtan şul uq könne Ankaranıñ Bilkent Universitetında konstitusia xoquqı buyınça leksiä uqırğa kilgän elekke Ustisia ministrlarınıñ berse professor Hikmät Sami Türk çaq qına höcümnän qotıldı. Anıñ yanına kilgän 23 yäşlek ber xatın-qız gäwdäsenä bäylägän bombanı şartlatırğa tırşışqan, ämma iminlek köçläre anı täsersez xälgä kitergän.

XS
SM
MD
LG