Accessibility links

шимбә, 3 декабрь 2016, Казан вакыты 07:54

Bilgä awılında tuy waqıtında bulğan wäxşi üterüne prezident Gül, artta qalğanlıq, dip bäyäläde. Bu artta qalğanlıq Törkiäneñ Yewropa Berlegenä ayaq basuın kiçektermäsme?

Törkiäneñ könyaq-könçığışında, Tönyaq Suriägä çiktäş Mardin şähäreneñ Bilgä awılında 4 mayda zur ber hälakät buldı. Tuyğa kilgän 44 keşe awıldağı tuğannarı tarafınnan üterelde.

İrtän tuyğa yolasına 50-läp keşe cıyıla. Alar arasında xatın-qızlar, xätta balalar da bula. Şul waqıt qullarına automat totqan 5-6 keşe yortqa bärep kerep, qunaqlarğa atalar. Bu faciğädän öç keşe genä isän qala.

Başta bu körd awılına üzläre dä körd bulğan PKK partizannarı xöcüm itte digän xäbärlär taralsa da, soñınnan eşneñ başqada buluı açıqlana. 35 öydän torğan 200-läp keşe yäşägän bu körd awılı PKK-ğa qarşı köräştä xökümät safında bulğan saqçılardan tora. Yäğni alar PKK partizannarı tirä-yaqqa kermäsän dip saqçılıq wazífası üti. Şunıñ öçen däwlät alarğa qoral, kiraä-yaraq häm eş xaqı birä.

Elektän PKK xökümät belän xezmättäşlek itkän awıllarğa xöcüm itep, küpläp keşene ütergäne bilgele. Menä şul säbäptän, tuy uzuçı yortqa xöcüm itüçelär yözlären qara bitleklär belän yabıp, şundıy täesir qaldırırğa telägännär. Läkin üterelmiçä qalğan ber şahit alarnıñ bu planın yuqqa çığara.

Xöcüm waqıtında irlär namaz uqıy torğan bula. Aralarında awılğa yaña ğına mulla bulıp cibärelgän 23 yäşlek yeget tä üterelä.

Gendarmeria awılğa kilep citkäç, şikle 12 keşene sorawğa tarta häm 10-sın saqqa ala, aralarında 14 yäşlek ber bala da bar. Şiklelärneñ ğailäläre 12 öy xalqı da üç alınudan qurqıp, mal-mölkätlären cıyıp, xätta terleklären suyıp yök maşínalarına tutırıp, awıldan küçep kittelär. Xäbärlärgä qarağanda, ber-bersenä tuğan bu ğailälär arasında miras säbäple elektän ük doşmanlıq bulğan.

İnde bu wäxşät turında böten Törkiä şawladı. Çit il matbuğatı belän räsmi şäxeslärneñ dä köçle reaksiase buldı. Prezident Gül: “Doşmanlıq, köndäşlek keşe ğömerennän östenräk tügel. Bu artta qalğanlıq, wöcdannı cäräxätlägän wäxşät”, dip bäyäläde.

Törkiä premer-ministrı Ärdoğan isä: “Bernindi ğädät tä monı aqlıy almıy”, dide.

Törkiädä, bigräk tä artta qalğan rayonnarda, ğailä ğädätlärenä qarşı kilgän qızlarnı, yäki “qan däğwası” dip atalğan ber ğailä äğzası üterelsä, qarşı ğailäneñ ber keşesen üterü kebek yola-ğädät bar. Bu isä Yewropa Berlegenä äğza bulırğa tırışqan Törkiä öçen ber qara tap bulıp tora.

Xäzer inde saqçılıq sistemınnan soraw alına başladı. Çönki däwlät üz qulı belän ğädi xalıqnı qorallandıra bit. Kördlärneñ Demokratik Cämğeyät Partiase bu awılnıñ saqçılıq sistemın tikşerü öçen Törkiä Böyek Millät Mäclese räislegenä ğäriza birde.

Qısqası, Törkiä artta qalğanlıq, arkaik ğädätlär belän köräş mäsäläsenä citdi ähämiät birergä tieş. Yuğıysä, täräkqi itkän illär safına ayaq basu öçen tağın berniçä distä yıl kötärgä turı kiläçäk.

XS
SM
MD
LG