Accessibility links

Törek armiäsenä psixologik basım arta


Generalştab başlığı general İlkär Başbuğ
Generalştab başlığı general İlkär Başbuğ

26 iyündä Anqarada Generalştab başlığı general İlkär Başbuğ: “Törek qorallı köçlärenä qarşı qayber oyışmalar asimetrik psixologik xäräkät alıp bara”, dip äytte.

Cir, diñgez, hawa häm gendarmeriä köçläre komandirları, tulayım 32 general häm Generalştabnıñ barlıq ofitserları şuşı matbuğat oçraşuında qatnaşıp, konferensiägä Törek qoralı köçläreneñ birgän ähämiäten kürsätte. Konferensiä küpçelek televidenie kanalları tarafınnan turıdan-turı tapşırıldı.

Generalştab citäkçese Başbugnıñ çığışına şundıy zur ähämiät birelüenä Törkiädä ike atnadan birle däwam itkän, general' ştabta xaqimiättäge AK partiä belän dini Fätxullah Gülän cämäğäten bärep töşerü planı digän dokumentnıñ matbuğatta faş iteleü säbäp buldı.

12 iyündä “Taraf" gazetası polkovnik Dursun Çiçäk qul quyğan ber dokumentnı bastırıp çığardı. Şunnan soñ törek mäğlümat çaraları belän säyäsät säxnäsendä qıämät quptı. Törek qorallı köçläre 1960, 1971 häm 1980 yıllarda xärbi fetnä arqılı xaqimiätne üz qulına eläktergänlektän, armiä qabat şundıy ber putçqa äzerlänä digän şikne tudırdı.

Bu dokument “Taraf” gazetası arqılı xalıqqa da mäğlüm bulğaç uq, Generalştab xärbi prokuraturası bu mäs'älä turında tikşerü başladı. 24 iyündä bu dokumentnıñ original bulmawı häm äzerlänü ısulu generalştabdağı başqa dokumentlarğa oxşamawı säbäple, bu turıda tikşerüne däwam itärgä kiräk tapmadı digän näticägä kilgän buluwın matbuğat orğannarına belderde.

Premyer-ministr Räcäp Tayip Ärdoğan Albaniägä kitär aldınnan jurnalistlarğa, mäsäläne sivil xökem orğannarı tikşeräçäk diyuwe, mäsäläne xärbi prokuratura tikşerüe belän riza bulmawın añlarğa birde. Ä oppotsiädäge Cömhüriät Xalıq Partiäse liderı Däniz Bayqal isä, bu dokument tügel, ä ber käğäz genä, dip xärbi prokuraturanıñ qararın xuplap, premyerne xalıqtan ğafu ütenergä çaqırdı.

26 iyündä Generalştab başlığı Başbuğ jurnalistlarğa töbäp: “Dönyada ekonomik krizis, Törkiädä terror xäräkätläre, kürşelärebez İran, Ğiraq, Afganstan häm Paqstanda citdi problemalar häm Kipr buyınça söyläşülär däwam itkändä, bez ike atna buyına ber käğäz kisäge tiräsendä böten energiäbezne israf ittek”, dide.

“Qayber oyışmalar tarafınnan uylap çığarılğan waqiğalar Törek Qorallı köçlären qaqşatu, aña yala yağu kampaniälärenä äverelde. Bu käğäz kisäge beräwlär tarafınnan äzerlände. Bolar fetnä taratu, yala yağu xäräkätläre… Mäğlümat çaraları arqılı asimetrik psixologik xäräkät alıp barıla. Törek qoralı köçläreneñ bötenlegen saqlaw, ilebezneñ tormışta qalu probleması bulıp tora. Xalqıbız putç häm ultimatum süzlärennän bizde”, digän fikerlär äytte ul.

Generalştab başlığı şunnan soñ yartı säğät däwamında zaldağı jurnalistlarnıñ sorawlarına cawap birde. Ul şuşı sorawlarğa cawap birgändä, Törek qorallı köçlärenä qarata psixologik xäräkät belän bäyle qayber misallar da kiterde.

“Dokument 2009 yılnıñ aprel' ayında äzerlängän dip äytelä. Ä dokumnentta data yuq. 17 aprel'dä Gendarmeriä komandirlığı kriminal raport äzerläde. Qayber öleşläre ğazetlarda basılıp çıqtı. Bolarnı kem matbuğatqa birgän soñ?

Dimäk, mäğlümat çaraları arqılı asimetrik psixologik xäräkät alıp barıla”, dide Başbuğ.

Başbuğ Törek qorallı köçläreneñ demokratiägä häm xoquqnıñ östenlegenä buysınuına berniçä märtäbä basım yasap, armiä eçendä dälilsez ğayıplene ezlämäyäçäklären dä äytte.

Generalştab başlığı İlkär Başbugnıñ şuşı matbuğat oçraşuında barlıq sorawlarğa häm şiklärgä cawap birde dip äytep bulmıy. Dimäk, bu turıdağı diskussiälär däwam itäçäk. Möhimräk temalar artqı planda qalaçaq.
XS
SM
MD
LG