Accessibility links

сишәмбе, 6 декабрь 2016, Казан вакыты 13:22

8-9 sentäber könnärendä İstanbul häm anıñ tirä-yağındagı rayonnarda qatı yawım-töşem buldı. Bu isä su taşqını hälaqätenä kiterde.

Xäzergä xätle 31 keşeneñ mäyete tabıldı, yözlägän ciñel häm yök avtomaşínaları suğa battı. Meñlägän yort, şifa yortı, mäktäp, fabrik-zavodlar häm eş urınnarına su bastı.

Bu hälaqätneñ kiläçäge aldan uq bilgele bulsa da, tiyeşle çaralar kürelmägänlektän yuğaltular da zur buldı. Televidenie kanalları avtobus, yök maşínası öslärendä, bina tübälärendä, ağaç käwsälärendä, törle qalqulıqlarğa sıyınğan keşelärne, alarnıñ qotqarılırğa tırışuın turıdan-turı säğätlär buyına kürsättelär.

İstanbul şähäreneñ Aziä belän Yewropa öleşen totaştırğan ike küper bar. TEM dip atalğan yulda Yäşilköy oçqıçlar maydanına 3-4 kilometr qalğan öleşe su astında qaldı. Su taşqını şul xätle köçle buldı ki, çit illärdän yök kitergän maşínalar, avtobuslar häm keçeräk maşínalar su östendä yözä başladı.


Tönne säğät 4-5-lärdä başlanğan yañğır taşqınnarğa säbäp buldı. İkitellidä xalıqara yök maşínaları ğarajında unnan artıq yörtüçeneñ mäyete çığarıldı. Alar maşínalarında yoqlağanda taşqın sularında batıp ülgännär. Su ike metrdan artığraq kütärelgän. Selimpaşa, Çatalca, Saray häm Silivri su astında qaldı.

Märmär diñgezeneñ yar buyındağı urnaşqan yazlıq öylär dä su astında qaldı. Mondağı avtomaşínalar da taşqın belän diñgezgä yözep kitte. Yullar, küperlär cimerelde. İgen qırları xarap buldı. Bu faciğänıñ fotoräsemnäre ğäzet bitlären tutırdı.

Törkiä meteorologia citäkçelege isä yawım-töşemneñ tağın bulaçağın, monıñ öçen tiyeşle çaralarnıñ kürelergä tiyeşlegen berniçä tapqır xäbär itsä dä, cawaplı orğannarnıñ berse dä moña qolaq salmağan buluı añlaşıldı. Şuşı taşqın hälaqätennän soñ, cawaplılar qotsız belderülär yasaw belän çikländelär.

Premyer Erdoğan taşqın bulğan cirlärgä urnaşqannarnı gäyepläde. “İneşneñ üçe qatı buldı”, dide.

İstanbul Böyekşähär bälädiäse räise Topbaş: “Monıñ cawaplısı - keşelär üzläre”, dip äytte.


İstanbul başlığı Güler isä: “Mäcbür bulmağannar yañğır waqıtında yulğa çıqmasınnar”, dip tağın da ziräkräk ber qaraş belderde. Ber jurnalistnıñ “Talawlar başlandı” digän süzenä, “yuq andıy närsä” dip şuşı jurnalistnı sükte. Ä şul uq minutta, yulğa çäçelgän törle cihaz häm äyberlärne österäp alıp kitkännärne televidenie kürsätep tordı.

Bu hälaqätneñ töp säbäbe isä - İstanbuldağı baytaq ineş häm yılğa yarlarında yäşäwleklär tözü öçen röxsät birelüe bulsa, şähärdäge 60% artığraq binalarınıñ röxsätsez salınğan buluı. İneş häm yılğalar yabılğan bulu säbäple, qatı yawım-töşem bulğanda su taşıy häm tirä-yaqnı cimerä.

Säyäsätçelärneñ töp qayğısı isä - saylawda tawış alu. Ämma alar küp köç häm aqça taläp itä torğan proyektlarğa iğtibar itmi. Alar mondıy hälaqät bulmasın öçen çara kürü mäsäläsen bik äkren xäl itälär. Äytik, 1999 yılğı cir teträw hälaqätenä un yıl tuldı, läkin tiyeşle çaralar äle dä kürelep betmäde.

İstanbul Säwdä Oyışması citäkçese Dr. Murat Karayalçınnıñ farazlarına qarağanda, älege su basu 80-90 million dollarlıq zıyan kitergän.

Qatı yawım-töşem bu atna azağına qädär däwam itäçäk. Könbatış belän Qara diñgezdä su taşqınnarı kötelä.

XS
SM
MD
LG