Accessibility links

шимбә, 3 декабрь 2016, Казан вакыты 16:58

Башкорт корылтаена әзерлек кыза


Җомга көнне Бөтендөнья Башкорт корылтаеның күчмә утырышы оештырылды. Бу юлы Чишмә районында үтте ул.

Элегрәк тә хәбәр ителүенчә, быел җәй - 11-12 июнь көннәрендә Уфада Бөтендөнья Башкортлары корылтае үтәчәк. Өченче тапкыр оештырыла бу зур җыен. Ике көн дәвамында корылтай кунаклары, төп эшчәнлектән тыш, республиканың башка төбәкләрендә оештырылучы мәдәни чараларда, сабантуйларда да катнашачак. Корылтайга 771 делегат сайлау каралган.

Башкорт корылтаена әзерлек алып бару мәсьәләләрен республиканың премьер-министры Раили Сарбаев һәм аның урынбасары, мәдәният һәм милли сәясәт министры Илдус Илишев турыдан-туры тикшерүдә тота. Бөтендөнья Башкорт корылтае Башкарма комитетының яңа рәисе итеп узган елның декабрь аенда гына Азамат Галин тәгаенләнгән иде.

Яшь җитәкче үзенең яңа вазыйфасында эшне бик җәһәт башлап җибәрде. Бөтендөнья Башкорт корылтае башкарма комитетының күчмә утырышларын оештыруны гамәлгә куйды ул. Бу ел башыннан берничә урында үтте инде ул очрашулар. Ә 26 февраль көнне бу киңәшмә Уфадан ерак булмаган Чишмә районында оештырылды.
Сөйләшүдә күрше-тирә районнардан да вәкилләр катнашты.

Киңәшмәдә Башкортстан Хөкүмәтенең башкорт корылтаена әзерлекне алып бару, аның финанс чыгымнарын билгеләү һәм башка оештыру эшләрен тикшерү каралган иде. Бу хакта әлеге очрашу алдыннан Бөтендөнья Башкорт корылтае башкарма комитетының җаваплы хезмәткәре Сәвия Газизова сөйләде.

Быелгы корылтайга әзерлеккә Башкортстан рәсми хакимиятләре дә бик җитди карый. Хөкүмәт байтак акчалар күчерә бу чарага. Шул ук вакытта корылтайны оештыру комитеты, әлеге җыенга хәйрия акчаларын туплау өчен, банкта махсус хисап та ачты. Анда теләгән һәрбер кеше һәм оешмалар үз юмартлыкларына бәрабәр акча күчерә ала.

Быелгы корылтайга әзерлектә бер мөһим генә яңалык та бар. Аңа делегатлар сайлауга кагылышлы ул. Бу юлы әлеге зур җыенга, элеккеләрендәге кебек, рәсми түрәләр күпчелек булмый, ә башкорт милләте өчен җан атып йөргән, милли оешмалар эшләрендә җегәрле катнашкан шәхесләр сайланачак, дип белдерелде. Моның шулай булачагына өметләре зур Башкорт корылтае җитәкчеләренең. Чөнки делегатларны сайлау хәстәрлеге бу юлы районнар һәм шәһәрләр хакимиятләре “кулыннан” тартып алынган.

Бөтендөнья Башкорт корылтае башкарма комитеты рәисе Азамат Галин әйтүенчә, III корылтайга әзерлек барышында аеруча быелгы халык исәбен алуга әзерлек һәм быел Башкортстанда игълан ителгән Республика елы мәсьәләләренә ифрат та зур игътибар юнәлтеләчәк.

фикерләрне күрсәт

XS
SM
MD
LG