Accessibility links

пәнҗешәмбе, 8 декабрь 2016, Казан вакыты 12:48

10 март көнне интернетта барлыкка килгән “Путин китәргә тиеш!” мөрәҗәгатен инде 3,5 меңнән артык кеше имзалаган. Ачык хат белән чыккан бер төркем зыялылар, мәдәният әһелләре премьер-министр Владимир Путин хакимият белән хушлашса, Русиягә нык ярдәм итәр иде дип саный.


Мөрәҗәгатьтә элек президент, хәзер премьер-министр булып эшләгән Путин сәясәте каты тәнкыйтькә тотылган.

“Путин китәргә тиеш” дигән ачык хат иң беренче “Ежедневный журнал” (www.ej.ru/?a=note&id=9935) интернет басмасында чыккан иде. Шуннан соң www.putinavotstavku.ru дигән махсус сәхифә барлыкка килде. Һәм анда әлеге мөрәҗәгатьне имзалаучылар арта бара. Җомга көнне Казан вакыты белән сәгать кичке 5-кә га анда инде 3,5 меңгә якын кеше үз кулын куйган иде.

Мөрәҗәгатьтә исә: Путин хакимлек иткән Русиядә бернинди дә алга китеш реформалары булмаячак. Илдә демократик үсеш бары хакимият һәм җәмгыять идарәсе Путиннан азат ителгәч кенә башланырга мөмкин. Нәкъ Путин үзенең хакимлеге чорында коррупциягә баткан тотрыксыз илдә үз халкына карата рәхимсезлек символы буларак истә кала, диелә.

Барысы да режимга бәйле

Ачык хатны имзалаучыларның берсе - язучы һәм совет заманындагы диссидент Владимир Буковский җәмгыятьтә Путин идарәсеннән канәгатьсезләр арта, ди.

Владимир Буковский
“Элегрәк ниндидер хыяллар булды. Хәзер алар юкка чыга бара. Соңгы вакытта илдә протест чараларының арта баруы да моңа ачык мисал. Ниһаять “көрчеккә терәлү” сәбәпләренең 2000 елда башланган режимнан булуын аңладылар”, ди ул.

Буковскийдан тыш, ачык хат астына бик күп мәдәният әһелләре дә кул куйган. Алар арасында Нобель бүләге лауреаты Андрей Сахаровның хатыны, хокук яклаучы, публицист Елена Боннер, танылган актер Алексей Девотченко, 1990 елларда “Курчаклар” сәяси сатира-тамашасын булдырган Виктор Шендерович һәм башкалар бар. Оппозициядән Борис Немцов һәм Гарри Каспаров имзалаган.

Ежедневный журналның баш мөхәррире Александр Рыклин “Азатлык”ка белдерүенчә, пәнҗешәмбе аларның интернет сәхифәсе хакерлар тарафыннан һөҗүмгә дучар булган.

Ул моны журналда урын алган ”Путин китәргә тиеш!” мөрәжәгате белән бәйле булырга мөмкин, дип аңлатты. Хәзер инде сәхифә эшли.

Юрий Шевчук
Түзәргә ярамый

Әлеге мөрәҗәгатькә нигез алдан ук салынды. 7 март көнне Мәскәүдә үз концерты барышында ДДТ төркеме рок җырчысы Юрий Шевчук хакимиятне тәнкыйтьләп узган иде.

Шулай ук Русия төбәкләрендә дә хөкүмәткә каршы протест чаралары арта. Гыйнвар азагында Калининградтагы каршылык чарасы 10 меңләп кешене җыйды.

Буковский сүзләренчә, “Левада” үзәге җитәкчесе урынбасары Алексей Гражданкин тикшеренүләр халык арасында Путинның абруе шактый югары булып калуын күрсәтә дисә дә, ачык хатны язучылар үзләрен әлеге эшне башкарырга тиеш дип саный.

“Без инде эшнең өметсез тоелуына ияләштек. Әмма аны барыбер эшләргә кирәк. Чөнки бу канунсызлык, җавапсызлык, репрессияләрне түзәргә ярамый”, ди ул.

фикерләрне күрсәт

XS
SM
MD
LG