Accessibility links

якшәмбе, 11 декабрь 2016, Казан вакыты 09:06

30 мартта Туймазы татар дәүләт драма театрында Зөлфәт Хәкимнең “Легионер” спектакле куелды. Бу пьеса 2007 елда “Яңа татар пьесасы” бәйгесенең җиңүчесе булган иде. Беренче тапкыр аны Туймазы театры сәхнәләштерде.

“Легионер” Бөек Ватан сугышында әсирлеккә эләгеп, татар һәм башкорт әсирләреннән төзелгән легионга кергән Яппар исемле кеше турында. Яппар беренче яуда ук советлар ягына чыкса да, гомере буе “сатлык җан” булып кала. 6 ел төрмә-лагерьларда утырып чыга. Шуннан соң да ул авылдашларының, туганнарының нәфрәтенә түзеп яшәргә мәҗбүр була. Бары тик әнисе генә аңа ышанычын саклый.

Спектакльне сәхнәгә театрның баш режиссеры Татарстанның һәм Башкортстанның атказанган сәнгать эшлеклесе Байрас Ибраһимов куйган, рәссамы Татарстанның халык рәссамы Сергей Скоморохов. Музыкаль яктан Башкортстанның атказанган сәнгать эшлеклесе композитор Ришат Сәгыйтов бизәгән. Баш роль Яппарны Башкортстанның атказанган артисты Фәндил Мөхәммәтдинов башкара, спектакльдә артистлар Айрат Солтанов, Гөлназ Латыйпова, Шамил Рәхмәтуллин, Маргарита Сидорова һәм башкалар катнаша.

Спектакль Бөек Җиңүнең 65 еллыгына багышлана. Бу турыда театрның әдәби бүлек мөдире Рида Гәрәева әйтте. Легионерлар темасы Бөек Ватан сугышы тарихында тиешенчә өйрәнелмәгән, ачыкланмаган һәм тиешенчә бәя алмаган әле, диде ул.

Премьераны Камал театрыннан Сергей Скоморохов, Инсаф Хәмитов һәм “Татарстан яшьләре” газеты хәбәрчесе Чулпан Фәттахова да караган. Чулпан Фәттахова спектакльдән канәгать калуын әйтте. “Барганда, читтәге театр, дип азракка өметләнгән идем, спектакль күпкә тәэсирлерәк булып чыкты. Гадәти булмаган куелыш, актерлар уены һәм көчле драматургия сокландырды. Спектакльне тамашачылар да яратып кабул итте”, диде ул.

Туймазы татар дәүләт драма театры 6 апрельдән Уфага “Нур” татар дәүләт театрына бер атналык гастрольләргә җыена. 8нче апрельдә Уфа тамашачысына “Легионер”ны да күрсәтәчәкләр.

фикерләрне күрсәт

XS
SM
MD
LG