Accessibility links

шимбә, 3 декабрь 2016, Казан вакыты 18:42

Новосибирскида өлкә татар мәдәният үзәге оешуга 20, өлкә татар милли мәдәни мохтариятенә 10 ел тулу уңаеннан тантаналы концерт-кичә булып узды.

Кичә татар үзәге урнашкан “Төзүчеләр” мәдәният сараенда барды. Төркемне юбилее белән тәбрикләргә Татарстаннан, Якутиядән, Барнаул, Омски, Кемерово шәһәрләреннән, Казакъстанның Семей шәһәреннән һәм өлкәнең авыл-районнарыннан күп кунак килгән иде. Тамаша залы шыгрым тулы булды.

Тәбрикләүләр

Беренчеләрдән булып сәхнәгә өлкә һәм шәһәр хакимиятләре вәкилләре күтәрелде. Алар үзләренең чыгышын татарча башлап җибәрергә тырышты. Аннары Новосибирски өлкә мәдәният министры урынбасары Владимир Миллер өлкә татар мәдәният үзәге җитәкчесе Рауза Тихомировага Русия мәдәният министрлыгының мактау кәгазен тапшырды.

Новосибирскиның өлкә мәдәният министрлыгының һәм шәһәр мәдәният идарәсенең рәхмәт хатлары һәм мактау кәгазьләре өлкә татар милли мәдәни мохтарияте рәисе Әмир Гәрәевкә, татар үзәге төркеменә, үзәкнең беренче җитәкчесе Хасип Касымовка һәм башка активистларга тапшырылды.

Өлкә мөселманнары исеменнән үзәкне юбилее белән Новосибирски Җәмигъ мәчете имам-хатибы Нәкыйп хәзрәт Шакирҗанов тәбрикләде. Нәкыйп хәзрәт өлкә татар мәдәният үзәгенә рәхмәтле булуын белдерде, “Милләттәшләребезгә дини һәм дөньяви тәрбия бирүдә татар үзәгенең керткән өлеше ифрат зур”, диде.

Альбина Кинҗалеева җырлый
Сәхнәгә чит төбәкләрдән килгән кунаклар чакырылды. Аларның тәбрикләүләре җыр-бию белән үрелеп барды. Татарстан мәдәният министрлыгының һәм Бөтендөнья татар конгрессы котлавын Татарстанның атказанган артистлары Рамил Миндияр, Фәис Бәйрәмов һәм яшь җырчы Альбина Кинҗалеева җиткерде.

Казакъстанда яшәүче татарлар исеменнән үзәкне юбилее белән Семей татар сәнгать мәктәбе җитәкчесе Габдулхак Ахунҗанов тәбрикләде.

“Новосибирски татар үзәген Казакъстанда да яхшы беләләр. Башка төбәкләрдә яшәүче татарлар арасында дуслык мөнәсәбәтләре урнаштыруда сез зур өлеш кертәсез”, - диде ул.

Габдулхак Ахунҗанов өлкә татар милли мәдәни мохтарияте җитәкчесе Әмир Гәрәевкә казакъ чапаны кидертте.

Новосибирскиның үзбәк оешмасы җитәкчесе урынбасары Дилфуш Абутов тәбрикләвен үзбәк телендә җиткерде. Ул Әмир әфәндегә үзбәк чапаны бүләк итте.

Татар үзәге - башкаларга үрнәк

Новосибирскиның авыл-районнарыннан килгән кунаклар да, төрле милли, мәдәни һәм иҗтимагый оешмалар вәкилләре дә “өлкә татар мәдәният үзәгенең алар өчен үрнәк булып тору”ын ассызыкладылар.

“Татар халкының милли бәйрәмнәре безнең өчен дә бәйрәмгә әйләнде. Без аларны көтеп алабыз, теләп катнашабыз,” диде алар.

Өлкә татар мәдәният үзәге каршында оештырылган балалар студиясендә шөгыльләнүче нәниләрнең чыгышы бер генә кешене дә битараф калдырмагандыр.



Татар үзәгенең уңышлары һәм проблемнары


Кичә барышында өлкә татар мәдәният үзәге җитәкчесенең милли мәгариф буенча җаваплы урынбасары Мөдәрис Абакиров белән очрашып сөйләшү мөмкинлеге дә булды. Әңгәмә барышында ул үзләренең уңышларына һәм килеп чыккан проблемнарга тукталды.

“Без шәһәр хакимияте каршында милли оешмаларның эшчәнлеген координацияләүче шура булдыруга ирештек. Анда иҗтимагый оешмалар үзләренең проблемнарын күтәреп чыга ала. Бу шура милли оешмаларның трибунына әйләнде”, ди Мөдәрис Абакиров.

“20 ел эчендә ирешкән уңышларыбызның иң әһәмиятлесе дип дәүләт тарафыннан финанслануга ирешүне әйтер идем. Башкалар өчен бу үрнәк булып тора”, ди Мөдәрис әфәнде.

“Әмма үзәк алдына проблемнар да килеп баса. Өлкә хакимияте барлык милли оешмаларны Завалокиннар йортында урнаштырырга уйлый. Анда дуслык йорты оештырырга ниятли. Ул вакытта безнең оешма дәүләттән финансланмаячак, бер-ике методист кына эш алып барырга тиеш булачак. Бу милли оешмаларны юкка чыгаруга тиң. Без, әлбәттә бу эш белән ризалашмыйбыз, губернаторга, шәһәр башлыгына хат юлларга җыенабыз,” ди Мөдәрис Абакиров.

Мөдәрис әфәнде үзәкнең грантлар конкурсында катнашып, уңышка ирешүе турында да сөйләде. Агымдагы елда өлкә хакимияте каршында оештырылган грантлар конкурсында үзәкнең “Чат татарларының 400 еллыгы” дигән проекты җиңеп чыккан. “ Бу проект буенча Новосибирски өлкәсенең Чат районында яшәүче татарлар турында китап язу каралган”, ди Мөдәрис әфәнде.

Юбилей кичәсеннән кунаклар да, тамашачылар да канәгать иде. Соңыннан оештыручылар янына килеп, рәхмәт әйтүчеләр күп булды. Үзәк җитәкчесе Рауза Тихомирова юбилей барышында да, кичәдән соң булган чәй өстәле артындагы аралашуда да өлкә һәм шәһәр хакимиятенә, килгән кунакларга һәм башкаларга рәхмәтле булуын белдерде. “Киләчәктә дә шулай бергә-бергә эшләргә язсын ”, диде.

"Алтын йолдыз" клубы яшьләре

XS
SM
MD
LG