Accessibility links

шимбә, 10 декабрь 2016, Казан вакыты 06:03

“The Kazan Herald” газетын чыгаручылар Татарстандагы чит ил белгечләрен һәм бөтен дөньяны күз алдында тотып эшли.


Шушы көннәрдә “The Kazan Herald” (“Казан мөхбире”) газетының гыйнвар саны әзерләнә. Анда Татарстанга, Русиягә килгән чит ил кешеләренең теркәлү кыенлыклары, виза проблемнары тасвирланачак.

Газетның тематикасы төрле. Мәсәлән, декабрь санында “Республикада сүз иреген булдыруга тагын бер адым ясалды” дигән әңгәмә, Татарстанда салым акчасының бүленеше, туризмның яңа юнәлешләре, Казанда үтүче халыкара беренчелек яңалыклары, Хәсән Туфанның 110 еллык юбилее уңаеннан шагыйрь турында мәгълүмат һәм аның шигырьләре басылып чыккан.

“The Kazan Herald” даталарны америкадагы гадәт белән күрсәтә. Башта ай саннары, аннары көне куела. Аңлашыла да - газет чит ил кешеләренә юнәлтелгән.

Татарстан турында инглизчә кем укый?

Газетның баш мөхәррире Рөстәм Юнысов әйткәнчә, “The Kazan Herald” күбесенчә Татарстанда яшәүче чит ил кешеләренә, туристларга атап чыгарыла.

Ул күбрәк Казан, Чаллы, Әлмәт кунакханәләрендә таратыла. Ә басма интернетка чыкканнан соң, аның аудиториясенә бөтен дөнья кергән дип әйтеп була.

Редакциягә Лондон, Париж, Нью-Йорктан да хатлар килә.
Рөстәм Юнысов
Мәсәлән, мөселман кинофестивале турындагы язмадан соң, кайбер укучылар анда катнашу мөмкинлеге белән кызыксынган.

Газетның баш мөхәррире белдерүенчә, инглизчә газетка Татарстанда да, аннан читтә дә ихтыяҗ бар. Һәм бу ихтыяҗны дәүләт түгел, басманы үз акчасына чыгаручы аспирант Рөстәм Юнысов, төрле оешмаларда эшләүче Дамир Валиуллин, Артур Мирошниченко, Сергей Саакьян, Даниил Матвеев һәм Казанга Нью-Йорктан инглизчә укытырга килгән Уат Форд (Wyatt Ford) канәгатьләндерә.

Татарстанда халыкара стандартлар белән эшләп буламы?

Газетны чыгаручы энтузиастлар төркеме күбесенчә чит ил матбугатыннан үрнәк алып, Татарстанда халыкара стандартлар белән эшләргә тырыша. Әмма бу өлкәдә кыенлыклар бар.

“Татарстан түрәләренә сорау бирәсе булса, башта хат язарга кирәк, аннары алар аны бер-ике атна карый, аннан соң гына, комментар бирергәме-юкмы дип, җавап бирә. Ә чит ил кешеләре белән андый проблем тумый”, дип сөйләде баш мөхәррир Рөстәм Юнысов. Ул бик зур чит ил ширкәте җитәкчесе белән әңгәмә хакында җиңел генә килешкәнен мисал итеп китерде.

Акча һәм бәйсезлек

“The Kazan Herald” әле яңа басма, аның беренче саны үткән елның май аенда чыккан иде. Бу проект республикада үткән яшьләр форумында иң уңышлы проект, дип танылган иде.

Президент Рөстәм Миңнеханов та инглизчә газет чыгару башлангычын хуплады һәм форумда баш мөхәррир Юнысовның кулын кысты. Әмма аннан соң да газетка бернинди ярдәм күрсәтелмәгән.

Икенче яктан, финансларны читтән алмагач, “The Kazan Herald” бәйсез була ала һәм, баш мөхәррир сүзләренчә, басма алга таба да кискен сораулар куярга, актуаль темаларны күтәрергә җыена.

фикерләрне күрсәт

XS
SM
MD
LG