Бу эшнең барып чыгуына Кырымның хөкүмәт рәисе Василий Джарты зур йогынты ясады дияргә мөмкин. Ул үзе 15 февральдә Акмәчет шәһәр шурасы сессиясендә депутатларны мәчет өчен җир аерырга чакырган иде. Шәһәр шурасында Василий Джарты җитәкләгән "Регионнар" фиркасе депутатлары күпчелекне тәшкил итә. Депутатлар уңай тавыш бирделәр.
Тантанада сүз алган Василий Джарты: «Мәчет безне аермый – ул безне берләштерә», диде.
Мостафа Җәмилев Василий Джартыга кырымтатар ирләр баш киеме – каракүлдән тегелгән калпакны кидерде.
Рифат Чубаров киләчәк буыннарга язылган мөрәҗәгатьне укып, аны капсулага куйды. Бу капсуланы хатирә ташның эченә Мостафа Җәмилев, Василий Джарты һәм мөфти Эмирали Аблаев урнаштырды.
Шулай итеп, шәһәр шурасы 10 ел дәвамында бу урында җир аерырга каршы булып, мөфтият аның белән дәвамлы мәхкәмәләрдә катнашып хәтта Украина Югары мәхкәмәсендә уңай карарга ия булса да, бу мәсьәлә хәл ителми иде. Шәһәрнең элекке башлыгы Г.Бабенко, октябрь аенда сайланган яңа башлыгы В.Агеев та матбугатта бу урында мәчет төзелмәчәк дигән белдерү ясаган иделәр. Тик бу эшкә Василий Джарты керешкәч, мәчет өчен җир аерылды.
Мәчет төзелешенә берничә миллион доллар акча кирәк булачак. Бу эштә Төркиядән дә ярдәм көтелә. Бу вакытка хәтле, ягъни мәчет өчен рәсми рәвештә җир аерылмаганын күреп, Төркия инвесторлары төзелешкә акча бирүне туктатып торган иделәр.
Мәчет урынын алу максаты белән 2006 елда кырымтатарлар «Мәчет төзелешенә һәрбер кешедән – бер таш!» дигән акцияне үткәреп, бу урынга 120 меңнән артык таш китереп куйганнар иде. Бу ташлар мәчет төзеләчәк урында хәзер дә тора.
Кырымда яңа Җәмигъ мәчетенә нигез таш салынды
Ун еллап бу җирне мәчет өчен таләп иткән мөфтият һәм Кырымтатар Мәҗлесе, Кырым мөселманнары, ниһаять, максатларына иреште. 3 март көнне Ялта-Акмәчет юлында төзеләчәк Кырымның иң зур мәчете нигезенә тантаналы рәвештә киләчәк буыннарга мөрәҗәгать урнаштырылды.
