Accessibility links

якшәмбе, 11 декабрь 2016, Казан вакыты 05:14

Бәләбәй татар гимназиясе тирәсендәге шау-шу басылыр кебек. Шушы арада аның дәрәҗәсен кире кайтару мәсьәләсе хәл ителергә охшаган.


Элегрәк тә хәбәр ителүенчә, август азагында, ягъни яңа уку елы башланырга берничә генә көн калгач, Бәләбәй татар гимназиясенә күңелсез хәбәр килде. 1995 елдан бирле эшләп килүче алдынгы милли гимназияне үзенең исеменнән мәхрүм итеп, аны гап-гади урта мәктәп итеп калдыру хакында карар кабул ителгән. Мәгарифкә күзәтчелек итү оешмасы, төрле сәбәпләр табып, әлеге карарны кабул иткән һәм аны Бәләбәй районы хакимияте аша гимназия мөдире Нурмөхәммәт Хөсәеновка тапшырткан.

Әлеге хәлне Нурмөхәммәт әфәнде ниндидер җитешсезлекләр аркасында түгел, ә татар гимназиясенә аның беренче көненнән үк киртәләр корудан килгән күралмаучылыктан, каршылыктан гына дип аңлата. Гимназия тирәсендәге җәнҗалга Башкортстан татар милли оешмалары да битараф калмады һәм 30 август көнне узган киңәшмәдә махсус мөрәҗәгать-белдерү кабул итте. Ә инде Бәләбәй татар гимназиясе укытучылар коллективы 5 сентябрьдә шәһәрдә төрле каршылык чаралары – митинглар, пикетлар оештыру ниятен әйткән иде.

Шундый катгый чараларга баруны җиткермәс өченме, башка сәбәпләрдәнме, Башкортстан җитәкчелеге татар гимназиясе мәсьәләсен тыныч хәл итү юлына баскан. 2 сентябрь көнне Бәләбәй татар гимназиясе мөдире Нурмөхәммәт Хөсәеновны Башкортстан вице-премьеры Зөһрә Рәхмәтуллина һәм мәгариф министры Әлфис Гаязов Уфада кабул иткән.

“Озак кына барган сөйләшү бик нәтиҗәле һәм уңышлы булды. Гимназия статусы шушы арада кире кайтарылачак”, диде бу очрашу тәмамлангач та, “Азатлык”ка биргән әңгәмәсендә Нурмөхәммәт әфәнде.

Нурмөхәммәт Хөсәенов әйтүенчә, хәзер хәлләр уңайга үзгәрүгә өмет уянгач, укытучылар коллективы киләсе атна башына билгеләнгән каршылык чараларыннан баш тарта. “Без югары хакимиятләрнең уңай карашын сиздек, шуңа да без дә килешеп, тату эшләү яклы”, ди гимназия мөдире.

фикерләрне күрсәт

XS
SM
MD
LG