Башкорт активистлары федерализм өчен көрәшә

“Ак тамыр” исемле башкорт мәгарифен үстерүгә булышлык итү оешмасы рәисе Ирек Агишев сүзләренә караганда, әлеге чаралар кысасында интернет сәхифәләрдә “Үзәк белән өченче килешү” исемле мәкалә чыккан. Әлеге язма уңаеннан бик күп фикерләр әйтелгән.

“Шулай ук аксакаллар шурасының берничә утырышы узды. Анда федераль килешү кирәклеген таләп итеп мөрәҗәгать кабул иттек. Ул Русия президенты Владимир Путинга, Башкортстан президенты Рөстәм Хәмитовка һәм Башкортстанның дәүләт җыелышы рәисе Константин Толкачевка җибәреләчәк. Без алдагы айда да эшчәнлекне дәвам итәргә булдык. Сентябрь урталарында барлык башкорт җәмәгатьчелеге оешмалары вәкилләрен җыеп җыен уздырырга уйлыйбыз. Шулай ук күрше республикалар: Татарстан, Чуашстан һәм тагы кайбер төбәктәге җәмәгатьчелекне чакырып фәнни-гамәли конференция уздырачакбыз. Андагы төп тема – федерализм мәсьәләсе булачак. Федерализм безнең өчен бик көнүзәк мәсьәлә, хәтта әйтер идем, ул безнең киләчәгебез, милләт буларак сакланып калу-калмау, милли республикалар язмышы дигән сүз”, дип сөйләде Азатлыкка Ирек Агишев.