Accessibility links

чәршәмбе, 7 декабрь 2016, Казан вакыты 23:24

Татарстанда "Булгария" корбаннарын искә алдылар


Татарстандагы Кама Тамагы районының Сөйки авылыннан ерак булмаган һәйкәл янында "Булгария" фаҗигасендә һәлак булганнар истәлегенә матәм җыены үтте.

Искә алу чарасында корбаннарның туганнары, якыннары – барлыгы өч йөзләп кеше, шулай ук республика президенты Рөстәм Миңнеханов һәм башка рәсмиләр катнашты.

Миңнеханов үз чыгышында туганнарын югалтканнарның кайгысын уртаклашуын әйтте һәм: “Бу югалтуны төзәтеп булмый, ул кешеләрне хәтерләп һәм шул хатирәләр белән яшәп кенә була”, диде.

Чарада катнашучылар корбаннарны бер минут тынлык белән искә алды. Иделдә кораб кычкыртуы ишетелде.

"Булгария" көймәсе 2011 елның 10 июлендә Болгардан кайтышлый батты. Көймәдә булган 211 кешенең 122-се, шул исәптән дистәләрчә бала батып үлде. Исән калучыларны "Булгария" яныннан үтеп барган "Арабелла" көймәсе коткарды.

Узган елның маенда бу фаҗига өчен гаепләнүчеләрне хөкем итү башланды. Быелгы матәм чаралары вакытында мәхкәмә эшләре өч көнгә туктатылып тора.

фикерләрне күрсәт

XS
SM
MD
LG