Accessibility links

шимбә, 3 декабрь 2016, Казан вакыты 01:24

8 август Самарның Җәмигъ мәчетенә гает намазына ун меңнән артык кеше җыелды.

25 ел элек Самарда милли хәрәкәт тергәкләнеп килгәндә бердән-бер мәчеттә намаз укыдылар. Күп булса 500 кешене җыйган тамашага да халык соклана иде. Чирек гасырдан соң Самарның җиде почмагында гает укыла, шуларның алтысы мәчетле. Җәмигъ мәчетендә намазны берьюлы 5000 кеше укый. Җомга намазларында шыплап тулса, гаетләрдә бина теләгәннәрне сыйдыра алмый.

Алдагы елларда намаз вакытында мәчет йортында намаз укучылардан соң йөрергә әле сукмаклар кала иде. Быел исә гаҗәеп хәл күзәтелде. Мәчетнең койма буйларында, алма бакчасында, юлларда намазлыксыз урын калмады. Бик күпләр баскан килеш кенә укыдылар. Алма төшәрдәй дә урын юк иде.

Ун меңнән артык халык олуг бер гаиләне хәтерләтте. Сакаллары төрле булса да, тәннәре төрле төстә булса да, буй-сыннары белән аерылып торсалар да, барчасының да йөзендә шатлык вә куаныч иде. Елмая-елмая күрешәләр, шатланып кочаклашалар, бер-берсенә бүләкләр бирешәләр. Гөрләп торган мөселманнар бәйрәмендә мөселман урыс кардәшләребез дә бер мохиттә бәйрәм рухында куандылар, үзләрен шул гаилә әгъзасы итеп хис иттеләр.

XS
SM
MD
LG