Accessibility links

чәршәмбе, 7 декабрь 2016, Казан вакыты 19:29

Сами Йосыф: "Казанга кабат килергә телим"


9 августта Казанда дөньякүләм танылган җырчы һәм композитор Сами Йосыфның концерты узды. Чара Рамазан гаете уңаеннан оештырылды.

Гает концерты Камал театры каршындагы мәйданда кичке җиделәрдә башланды. Җыелган халыкны башта Ильяс Халиков, Фәрит Галаветдинов кебек татар җырчылары татарча мөнәҗәтләр белән "кыздырды". Дагыстаннан килгән "Нәшидул-Ислам" төркеме чыгышын да тамашачылар җылы кабул итте.

Сәгать тугызда сәхнәгә бәйрәм концертының төп җырчысы - Британиядән килгән Сами Йосыф чыкты. Бар дөньяга танылган җырчы рояльдә үзе уйнап һәм үзе үк җырлап мәйданны тутырган меңнәрчә тамашачыны үзенә "әсир" итте.

Сами Йосыф концерт барышында тамашачыны саф татар телендә сәламләп, "Ураза гаете мөбәрәк булсын! Казанда булуыма мин бик шат. Мин сезне бик яратам, Аллаһ бәрәкәт бирсен!" дип бәйрәм белән котларга да онытмады.

Сами Йосыф бер сәгать буена тамашачыны үзе иҗат иткән җырлар белән сөендерде. Җырларын "җанлы" башкарган артистның чыгышлары төрек, гарәп, инглиз телләрендә барды. Аңа, мәйданны тутырган тамашачы да кушылгалады.

Танылган артист концерттан соң Татарстан журналистлары белән дә тиз генә очрашып алды. Татарстанны, Казанны бик ошатуын белдергән Сами Йосыф бигрәк тә Кол Шәриф мәчетенә таң калун әйтте.

"Татарстанда төрле дин вәкилләренең бергә тыныч яшәве бик куанычлы күренеш. Бу бар дөньяда шулай булырга тиеш дип уйлыйм. Татарстанда тамашачы мине шулай җылы кабул итәр дип уйламаган идем. Бу хәл мине бик сөендерде һәм дулкынландырды да. Оештыручыларга бик зур рәхмәт. Кабат Татарстан, Казанга килергә теләр идем", дип белдерде ул.

Көчле иминлек чаралары күрелгән концерт тыныч үтте. Иганәчеләрнең ярдәме белән Татарстан мөфтияте оештырган гает концертына керү бушлай булды.

фикерләрне күрсәт

XS
SM
MD
LG