Accessibility links

җомга, 2 декабрь 2016, Казан вакыты 21:08

Мисырда гадәттән тыш вәзгыять тәртибе кертелде


Мисырда берничә йөз кеше һәлак булган бәрелешләрдән соң бер айга гадәттән тыш вәзгыять тәртибе кертелде. Хакимият тәртип саклауда полициягә ярдәмгә армияне дә җәлеп итә.

Мисырда чәршәмбе көнне хакимият көчләре протест белдерүчеләрне көч белән куып таратканда һәлак булганнар саны турында каршылыклы хәбәрләр килә. Хакимият бу бәрелешләрдә илнең төрле урыннарында барлыгы 278 кешенең һәлак булуын әйтсә, июль аенда хакимияттән бәреп төшерелгән президент Мөхәммәт Мурсины яклап протест чараларын оештыручы Мөхәммәт Мурси тарафдарлары һәлак булучылар санының ике меңгә җитүен белдерә. Каһирәдәге хәбәрчеләр бик күп мәетләр күрүе турында хәбәр итә.

Корбаннар арасында демонстрантлар да, полиция хезмәткәрләре дә бар. Шулай ук Sky News телеоператоры Мик Дин һәм «Мөселман кардәшләр» җитәкчелегенең берсе булган Мөхәммәт әл-Белтагиның 17 яшьлек кызы Әсма үлгән. Ата кешенең үзен хәзер полиция эзли.

Премьер-министр Һазим Библәви протест белдерүчеләрне куып тарату карарының бик авыр карар булганлыгын белдерде. Ул шулай ук әлеге чараларда кешеләрнең һәлак булуына кызганыч белдерде һәм гадәттән тыш вәзгыять тәртибен мөмкин кадәр тизрәк бетерергә вәгъдә итте.

Эчке эшләр министры Мөхәммәт Ибраһим полициянең бик яхшы эшләгәнлеген һәм бу чараларда илнең төрле урыннарында 43 полиция хезмәткәренең һәлак булганлыгын белдерде.

Каһирәдә иминлек көчләре Мурсины яклаучыларның ике чатырлар шәһәрчеген җимерде. Мурсига теләктәшлек күрсәтүче "Мөселман кардәшләр" җитәкчелеге вәкиле Гехад әл-Хәддәт сүзләренчә, сүз полициянең ниндидер операциясе турында түгел, ә июльдә президент Мурсины хакимияттән читләштергән “түнтәрелешкә каршылык белдерүчеләрнең авызларын томалау омтылышы” турында бара.

Бәрелешләр Мисырның башка шәһәрләрендә дә дәвам итә. Мисал өчен Сохаг шәһәрендә копт-христианнарының өч чиркәве яндырылды. Коптлар Мурсиның вазифасыннан читләштерелүен яклап чыккан иде.

Күп кенә илчелекләр кебек, Каһирәдәге Русия консуллыгы дә шәһәрдәге бәрелешләр сәбәпле, халыкны кабул итүне вакытлыча туктатып тора.

“Хәзерге вакытта илчелек районында хәл тыныч. Русия ватандашлары арасында зыян күрүчәләр юк. Каһирәдәге бәрелешләр сәбәпле консуллык бүлеге кешеләрне кабул итми, әмма консуллык һәм илчелек үзе эшли”, диелә Мисырдагы Русия илчелегенең белдерүендә.

фикерләрне күрсәт

XS
SM
MD
LG