Accessibility links

Кайнар хәбәр

Равил Фәйзуллин 70 яшен билгеләде


Равил Фәйзуллинга 70 яшь
please wait
урнаштыру коды

No media source currently available

0:00 0:06:38 0:00

Равил Фәйзуллинга 70 яшь

20 сентябрьдә республиканың милли музеенда халык шагыйре Равил Фәйзуллинның 70 яшьлеген билгеләп үттеләр. Ул әдәби кичә рәвәшендә узды. Равил Фәйзуллин бу очрашуның зур юбилей чараларының башы булуын, тормыш дигән Сабантуйда батыр булып калырга кирәклекне әйтте.

Татарстанның милли музеена "Казан утлары" журналының баш мөхәррире, халык шагыйре, Габдулла Тукай премиясе иясе Равил Фәйзуллинның 70 яшьлеген үткәрергә иҗатташ дуслары, тәрҗемәчеләр, җырчы-музыкантлар, мәктәп укучы-студентлар килгән иде. Монда гадәти иҗат кичәләрендәге кебек йөзләгән халык булмады. Тыйнак, җылы, әдәби очрашу. Равил Фәйзуллин белдергәнчә, эш санда түгел, ә сыйфатта. Аның 70 яшьлеккә багышланган чаралар әле башлана гына икән, алга таба Казанда опера һәм балет театры бинасында, Мәскәү залларында әдәби-музыкаль кичәләр көтелә.

Шагыйрь Татарстан башкаласындагы теләсә кайсы мәдәни үзәктә, затлы, уңайлы залларда иҗат кичәләрен үткәрә алу мөмкинлеге булуны соңгы дистә елларның казанышы дип атады. 20-30 ел элек хәлләр башкачарак булган икән. Шулай ук ул татар әдәбиятының сыйфат ягыннан зур аренага чыгуын да әйтте. Шагыйрь интернет белән дә дус икән, ләкин нинди татар сайтларын карыйсыз дигәч, "Мин бөтенесен дә карыйм дип әйтә алмыйм" дип җаваплады. Бүген ул компьютерда да, каләм белән дә иҗат итә, ахыр чиктә өстенлек электән килгән ручка, каләмгә бирелә, ди Фәйзуллин.


Шагыйрьдән "Милләт үлгәнме, әллә йоклаганмы?" дип тә сорадык.

– Ул йоклый да алмый һәм үлә дә алмый. Милләт барыбер үзенчә үсеш кичерә. Сезгә ошыймы-юкмы, монсы икенче мәсьәлә.

– Яңа буынның үз Равил Фәйзуллиннары булырмы, киләчәк язучы-шагыйрьләрен сез ничек күз алдына китерәсез?

– Алар булачак. Әлбәттә сыйфатлары бүтән төрле булыр, тик көчләре, потенциаллары безнекеннән ким булмаячак, диде шагыйрь.

Әлеге очрашуда чыгыш ясаучы иҗатташ дусты Гәрәй Рәхим Равил Фәйзуллинның үткән гасырның тоталитар чорларында да беренчеләрдән булып кыю, тыелган фикерле әсәрләр язуын әйтте.

Язучы прозаик, "Казан утлары" журналының проза бүлеге мөхәррире Камил Кәримов сүзен яшьләрдән башлады. Җитәкчелек алар кулында, ялгыш эскперимент ясап әдәбиятны чәл-пәрәмә китермәсәләр ярар иде дип борчылды. Аның сүзләренчә, шушындый катлаулы заманада "Казан утлары" журналын Равил Фәйзуллин исеме саклап килә.

"Без аңа ышыкланып яшибез. Ул шагыйрь генә түгел, прозаик та, аның "Илбагар уйлар" исемле фәлсәфи китабы Гаяз Исхакый премиясен алды. Шулай бергә булсак иде, бергә эшләү мәҗбүри түгел, без хәзер көйсез халык, коры утын кебек кубып төшәргә торабыз. Ләкин бергә булсак иде, бу сезнең яраткан сүзегез", диде Камил Кәримов Равил Фәйзуллинга карап.

Әдәби кичә азагында шагыйрь күңелендә туган уйларын җиткерде. "Килер бер көн, кемдер инде янда булмас, сагынырбыз. Бер очрашу үзе бер гомер", ди Равил Фәйзуллин. Сүзен ул шигырь укып тәмамлады. Килгән кунакларга шигар булып, "Тормыш дигән халыкара Сабантуйда батыр булып кала алырга кирәк безгә", дигән сүзләре яңгырады.
XS
SM
MD
LG