Accessibility links

шимбә, 10 декабрь 2016, Казан вакыты 13:57

"Калеб" җыенында AZAT төркеме җырлады


26 сентябрьдә Казанның Актерлар йортындагы "Театральное" кафесында "Калеб" яңа буын яшьләр җыены альтернатив татар музыкасын уйнап җырлаучы AZAT Sound System төркемен кунакка чакырды. Дистәләгән татар яшьләре чит ил сәхнәләрендә яңгыраган милли көйләр, татар эстрадасы өчен гадәти булмаган фикерләр, яңа буын шигырьләрен ишетте.

"Калеб" яңа буын җыенының быел бу икенче очрашуы булды. Беренчесе Камал театрының кече сәхнәсендә яшь композитор Эльмир Низамов иҗатына багышланган иде.

"Калеб"нең әйдаманы Гүзәл Сәгыйтова белдергәнчә, AZAT Sound System төркеме белән үтәсе чараны импровизациягә бай итеп, гадәти сценарий кысаларына кертмичә оештырырга телиләр һәм шулай булып чыга да. Чөнки җыенның төп кунаклары да үз иҗатларында импровизацияне еш кулланалар. "Азат"ларның баянчысы Айдар Вәлиев сүзләренчә, алар һәр чарада җырларын кабатланмас көйләр белән баеталар. Тамашачы бүген ишеткән музыкаль кисәкләрне иртәгә башка яңгырашта ишетәчәк. Шунда ук ул AZAT Sound System төркеменең төп кыйбласын да әйтте.

"Төркем барлыкка килүгә үк Европа, Балтыйк буе илләрендә, Мәскәүдә барган фестивальләрдә катнашу максаты куйды. Әлеге эстетик яктан бай, затлы чараларда без уйнап башкарган татар җырларын яхшырак, хөрмәтләп кабул итәләр. Татарстанда исә җыр бакчасын шулкадәр чүп баскан ки, татар эстрадасын мөгаен хәзер комбайн белән урырга кирәк. Шуңа да без ул бакчага кермибез диярлек, татар җырларын яраткан, хөрмәт иткән зур, зәвыклы сәхнәләр дә бик күп", ди Айдар.



"Азат" проектына баянчы Айдар Вәлиев килүе белән төркемнең яңгырашы бермә-бер байый, күләме арта, яңгырашы бизәлә. Әйдаманнары Азат Гыйлметдинов белдергәнчә, Айдар - дөньяда уникаль баянчыларның берсе икән. Ул милли көйләрне моңлы итеп тә, альтернатив музыка кысаларында да тиешле дәрәҗәдә уйный ала. Казан консерваториясен бетергән, төрле илләрдә халыкара бәйгеләрдә катнашып лауреат булган.



Айдар татар эстрадасын чүп басуын әйтсә, Азат җырчы-артистлар өчен яңа чор башлануы хакында сөйләде.

"Безнең буынга әле иртәдер, ләкин алга таба киләчәк яңа буыннар башка музыканы тыңлыячак. Инде бүгеннән үк артистларга бик кыен булачак. Чөнки артыңда масс-медиа тору гына җитми, ә кабатланмас, оригинал, үзенчәлекле булу шарт булачак. Элек гомум масса иде. Шуларның җыр җыентыкларын чыгарып акча эшләделәр. Бүген исә дисклар чыгару бетте диярлек, алар башка булмаячак. Музыка дөньясы да яңа чорга күчә, бу безгә файдага дип уйлыйк", диде Азат Гыйлметдинов. Аларның төркемендә дүрт егет, калганнары рус телле, аз сүзле иде, Илдар Субаев - бас-гитара, Максим Куприянов - бәрмә уен коралы остасы.

"AZAT"лылардан кала "Калеб" җыенында яңа буын шагыйрьләре Рүзәл Әхмәдиев белән Эльвира Һадиева да чыгыш ясады. Тамашачыларга бигрәк тә музыкаль төркем белән Эльвираның импровизациясе, шигырьнең тере көйгә укылуы ошады, истә калды. Шагыйрәнең кыюлыгына "AZAT"лылар да "Калеб"не оештыручылар да сокланды. Киләсе яңа буын җыены 22 октябрьдә булыр дип көтелә.

фикерләрне күрсәт

XS
SM
MD
LG