Accessibility links

шимбә, 3 декабрь 2016, Казан вакыты 16:47

Казанда "Мәхәббәт FM" шаукымы


Октябрь аенда Камал театрының зур сәхнәсендә яңа сезонның премьерасы - Илгиз Зәйниевнең "Мәхәббәт FM" эстрада-джаз комедиясе күрсәтелә башлады. Әлеге әсәрне хәбәрчебез дә тамаша кылды.

"Мәхәббәт FM" комедиясенең төп геройлары - Ильяс (Эмиль Талипов) белән Чулпан (Гөлчәчәк Гайфетдинова) радиода эшлиләр. Берсе ди-джей, икенчесе тавыш режиссеры. Бер-берсен яраталар, әмма берсе дә үз хисләрен аңларга теләми. Вакытлары бик аз, Ильясның кыюсызлыгы сәбәпле Чулпан башка иргә кияүгә чыга. Ләкин әсәр азагында вакыйгалар Ильяс файдасына үзгәрә. Аңа дуслары ярдәмгә килә. Алар да спектальдә мәхәббәт эзли һәм таба диярлек.

"Мәхәббәт FM" комедиясен башыннан азагына кадәр Эмиль Талипов "тартып бара". Аның пародиягә осталыгы күпләрдә соклану хисе уятты. Бу спектакльдә ул Салават Фәтхетдинов, Айдар Галимов, Илдар Хайруллин, Айдар Фәйзрахманов, Миңтимер Шәймиев, Хәмдүнә Тимергалиева, Равил Шәрәфиев булып уйный. Сүзләрендә, шаяртуларында тормыш чынбарлыкларыннан көлү, чеметү, төрттерү дә бар. Башка геройларда да милләт язмышына кагылышлы фикерләр яңгырады. Мәсәлән, ГАИ хезмәткәре татар киносын булдыру белән янып йөрүен, татар киносы өчен борчылуын әйтте.

Әсәрдәге геройларның барысы да егет-кызлар, спектакль яшьләр аудиториясенә адресланган. Ул бүгенге яшь буынга хас юмор, пародияләр, яшәү һәм аралашу рәвеше белән сугарылган. Әмма олы яшьтәге тамашачы да яраткан җырчылары Илһам Шакиров, Хәмдүнә Тимергалиева, Салават Фәтхетдинов һәм башка башкаручыларның җырлары белән үрелеп барган тамашага битараф калмады һәм калмас дип уйлыйк. Камалда "Мәхәббәт FM"ның чираттагы күрсәтмәсе 24 октябрьдә булачак. Чираттагы спектакльне карарга җырчы Салават Фәтхетдинов та килергә тиеш. Инде Татарстан президенты киңәшчесе Миңтимер Шәймиев тормыш иптәше Сәкинә ханым белән спектакльне тамаша кылды, диде Камал театры.

XS
SM
MD
LG