Accessibility links

дүшәмбе, 5 декабрь 2016, Казан вакыты 13:45

"Русия төрмәләрендә күп кенә сәяси тоткыннар кала"


Ходорковский Русия төрмәләрендә күп кенә сәяси тоткыннар кала, диде һәм Көнбатыш сәясәтчеләрен Русия президенты Владимир Путин белән очрашканда моны истә тотарга чакырды.

Русия президенты Владимир Путин тарафыннан ярлыканып узган җомга көнне иреккә чыгу белән үк Германиягә очкан күренекле эшмәкәр Михаил Ходорковский якшәмбе көнне Берлинда матбугат очрашуы уздырды.

Очрашу башында ук Ходорковский: "Күрәсең, минем иреккә чыгуым киңкүләм мәгълүмат чараларын, шул исәптән сез вәкиллек иткән мәгълүмат чаралары ярдәмендә мөмкин булгандыр. Барыгызга да зур рәхмәт! Минемчә киңкүләм мәгълүмат чараларының игътибары бүген гаделсез рәвештә Русия төрмәләрендә ябып тотылган бик күп кешеләргә сәламәтлекләрен һәм иреккә чыгуга өметләрен сакларга ярдәм итә. Безнең барыбыздан да моның өчен рәхмәтебезне кабул итеп алыгыз. Шәхсән мин, әлбәттә, узган ун елда үземнең дусларымның, бизнес-партнерларымның һәм, әлбәттә иң мөһиме, гаиләмнең ярдәме өчен рәхмәтлемен. Бу ярдәмне сизмәгән булсам, түзү авыр булыр иде.

Ун елдан артык төрмәдә утырган, быел 50 яшен тутырган Ходорковский үзенең иреккә чыгуына Германия канцлеры Ангела Меркельнең дә зур өлеш керткәнлеген иреккә чыккач кына, башкалар өчен гадәти, үзе өчен яңа мәгълүмат чаралары аша белгәнлеген әйтте. Ул Facebook һәм Twitterны телгә алып үзе төрмәгә ябылган чакта аларның әле булмаганлыгын искә алды.

Михаил Ходорковский Русия төрмәләрендә күп кенә сәяси тоткыннар кала, диде һәм Көнбатыш сәясәтчеләрен Русия президенты Владимир Путин белән очрашканда моны истә тотарга чакырды. Ходорковский үзенең иреккә Путин ярлыкавы белән чыгуын Русиядә сәяси тоткыннар калмавын күрсәтүче дәлил буларак кабул итәргә ярамавын әйтте. "Мин үземне җәмгыять басымы белән беркем дә иреккә чыгар дип көтмәгән кешеләрне дә азат итеп булуын күрсәтүче бер символ буларак кабул итүләрен теләр идем, диде Ходорковский.

"Русия президентының матбугат вәкиле минем теләгән вакытта Русиягә кайтуыма беркем дә комачауламавы турында әйтте. Кызганыч ки, минем теге яки бу эш белән кая да булса китә алуыма, ә хәзер мин гаилә эшләремне иң мөһиме дип саныйм, бернинди гарантия юк", дип Ходорковский Русиягә кайтырга җыенмавын аңлатты. Аның әйтүенчә, Германия хөкүмәте аңа бер еллык виза биргән. Ходорковский элегрәк шулай ук оппозициянең спонсоры булмаячагын яки ЮКОС милкен кире кайтару өчен көрәшмәячәген әйткән иде.

Ходорковский әйтүенчә, хакимиятләр аның иреккә чыгарылуы өчен нинди дә булса шарт куймаган, әмма ул Путинга язган хатында сәясәттә катнашмаячагы яки милек кайтару өчен көрәшмәячәге турында белдергән булган.

Заманында Русиянең иң бай кешесе булган, салымнардан качуда гаепләп ике мәртәбә хөкем ителгән Ходорковский үзенә белдерелгән гаепләүләрне беркайчан да танымады. Ул киләсе елның августында иреккә чыгарга тиеш иде. Әмма декабрь аенда хакимият аңа карата өченче җинаять эше ачылуы турында да белдерде.

фикерләрне күрсәт

XS
SM
MD
LG