Accessibility links

чәршәмбе, 7 декабрь 2016, Казан вакыты 11:57

"Татар дозор" 30дан артык кибеттә татар теле кулланылышын тикшергән


"Татар дозор"да катнашучылар Казанның 30дан артык кибетендә булып татар теленең кулланылышын күзәткән. Аларның сорауларына дорфарак җавап бирүчеләр дә табылган.

"Татар дозор"да катнашучы җиде төркем төрле маршрут буйлап төрле биремнәрне үтәде. Алар Казанның Бауман урамы, Ирек мәйданы, Ляцкий бакчасы, Бутлеров урамы, Гумилев һәйкәле, Ленин бакчасы, Сукно бистәсе, Кирмән, Татар бистәсе, Клячкин шифаханәсе янында булды. Шул юл барышында алар кибетләрдә дә булып татар теленең кулланышын тикшергән.

КФУның филология һәм мәдәниятара багланышлар бүлегенең IV курс студенты, Бөтендөнья татар яшьләре форумы волонтеры Диләнур Әхмәтҗанованың Азатлыкка әйтүенчә, анда катнашучылар юлларында очраган кибетләрдә сатучыларның татарча сөйләшү-сөйләшмәве хакында сораштыру уздырган. Икетеллелек канунының үтәлешен караган. Элмә такталарны тикшергән.

"Кайбер кибетчеләр татарча белмичә дорфарак та җавап бирделәр. Укучылар аларга аңлатырга тиеш иде, ни өчен татарча сөйләшергә тиешлеген. Әгәр татарча язулар булмаса, тәкъдимнәр китабында киңәшләр калдырдылар. Төрле аңлату эшләре алып бардылар. Кибетләрдә татарча хезмәт күрсәтелсә, "Мин татарча сөйләшәм" тамгасын ябыштырып киттеләр.

"Татар дозор" биремнәренә килгәндә, алар фотопар ярдәмендә икенче бирем урынын билгеләде, шулай ук шигъри юллар ярдәмендә өченче ноктаны тапты. Мисал өчен "Унөч капка һәм манараны таш дивар урап алган, хан төрбәсе, каберлекләр монда сакланып калган" дүртюллыгы Кирмәнне аңлата. Шул Кирмәнгә юл алганда алар флешмоб ясадылар.

Төрле жанрда видео-фотолар төшереп инстаграмга куя бардылар.

Иң соңгы маршрут Казанның Меңъеллык паркындагы Кол Гали һәйкәле иде. Кыйссаи Йосыф әсәреннән өзекләр ярдәмендә алар шушы урынны билгели алды. Андагы паркта Зилантның авызына комган куелган була. Әлеге комганның эчендә флешка иде һәм анда беренче килүчеләрне котлау урнаштырылды. Беренче булып Түбән Камадан кызлар такымы килеп җитте.

Шулай да, бу әле җиңү дигән сүз түгел. Без хәзер тиз арада аларның фотоларын, видеоларын карап бәя бирәчәкбез. Җиңүчене "Мин татарча сөйләшәм" гала-концерты барышында котлау булачак", диде Әхмәтҗанова.

Бөтен төркемнәр паркка килеп җиткәч "Мин татарча сөйләшәм" футболкаларында байраклар тотып, сөрәннәр кычкырып Бауман урамына таба җырлап-биеп барган.

фикерләрне күрсәт

XS
SM
MD
LG