Латвия парламентына 4 октябрь узган сайлауда илдә яшәүче руслар мәнфәгатен кайгыртучы "Согласие" социал-демократик фирка күпчелек тавышларны (23,13%) алды. Аның җитәкчесе - Рига мэры Нил Ушаков.
Икенче урында "Единство" берләшмәсе (21,76%). Латвия премьер-министры Лаймдото Страуюма әлеге партиянең әгъзасе. Өченче урында "Яшелләр" һәм крестьяннар берлеге (19,62%). Парламент - сеймга шулай ук милләтче партияләр вәкилләре дә керәчәк.
Тавыш бирүгә хокукы булган миллион ярым кешенең 59% сайлауга килгән. Латвия бәйсезлек игълан иткәннән соң төрле сәбәпләр аркасында Латвия ватандашлыгын алмаган рус телле 320 меңләп кеше сайлауда катнашмаган, дип хәбәр итә ИТАР-ТАСС.
