Accessibility links

шимбә, 3 декабрь 2016, Казан вакыты 12:47

2015 елга Татар календаре дөнья күрсен өчен 100 мең сум акча кирәк. Шуның 52 меңе инде җыелган. Акция 10 ноябрьдә тәмамлана.

Мардизайн студиясе һәм Бөтендөнья татар яшьләре форумы 2015 елга Татар календарен бастырып чыгару өчен краудфандинг ысулы белән акча җыя. Проект популяр "Бумстартер" сәхифәсендә алып барыла.

Календарьне бизәү эшендә Русиянең төрле шәһәрләреннән сәләтле рәссамнар катнашты. Унике ай – унике рәссам – унике кабатланмас сәнгать әсәре. Алар татар дөньясын сынлы сәнгать, графика, күннән каеп эшләү, керәч (керамика) техникаларындагы әсәрләре аша сурәтли.

Татар календаре милли темада эшләүче рәссам-дизайнерларны берләштерә, заманча татар мәдәниятен популярлаштыра. Алай гына да түгел, шушы проект ярдәмендә оештыручылар борынгыдан татарларда кулланылып килгән ай исемнәрен әйләнешкә кире кайтару максатын да куя. Мисал өчен, гыйнвар ае календарьда акман дип аталачак, март – яңарыш яисә нәүрүз, сентябрь – билек, октябрь – каракөз.

Календарьда шулай ук Русиядә, татарларда һәм мөселманнарда каралган бәйрәм көннәре дә билгеләнәчәк. Моннан тыш, оештыручылар вәгъдә иткәнчә, елнамәне бастырырга 50 мең сумнан да ким булмаган күләмдә матди ярдәм күрсәткән кешенең туган көне дә билгеләп куелырга мөмкин.

Татар календаре – уникаль басма. Һәр бите – аны бизәгән рәссамның иҗат җимеше. Дизайнерлар арасында Татарстан республикасында мәшһүрлек казанган сәнгать осталары белән беррәттән студентлар һәм сәнгатьтә юлын башлап кына җибәргән иҗатчылар да бар.

Календарьне бизәүдә танылган сәнгать осталары Булат Гыйлванов, Наилә Кумысникова, Әлфия Җәмилова, Сәгыйдә Сиразиева, Илдус Мортазин катнашты. Басмада шулай ук яшь дизайнерлар – Гүзәл Гарипова, Ләйсән Мәрдәншина, Назыйм Исмәгыйлев, Тимур Гыймранов, Любов Шиһабетдинова һәм Алия Сабитова әсәрләрен күрергә була. Әйтергә кирәк, календарне бизәү эшен алар түләүсез башкара, бу – сәнгать осталарының татар мәдәниятен үстерүгә керткән шәхси өлеше булачак.

Тәүге тапкыр Татар календаре узган 2014 елда дөнья күрде. Беренче басманы Мәскәү, Казан, Уфа, Британия, Новосибирски, Петербурдан креатив татар яшьләре – иллюстраторлар, дизайнер, архитекторлар, шулай ук классик сынлы сәнгатьтә иҗат итүче рәссамнар бизәде.

Татар календаре табыш китерсен өчен эшләнми. 2014 ел календарен сатудан кергән бөтен акча милли сәнгатьне үстерүгә, яшь татар дизайнерларының башка проектларына ярдәм күрсәтүгә юнәлтеләчәк, грантлар рәвешендә бүлеп биреләчәк.

фикерләрне күрсәт

XS
SM
MD
LG