Accessibility links

якшәмбе, 4 декабрь 2016, Казан вакыты 09:21

Казанда Болгар һәм Зөя күргәзмәсе ачылды


13 февраль Казанның "Манеж" күргәзмәләр залында "Болгар һәм Зөя: үткәне һәм бүгенгесе" исемле күргәзмә ачылды. Ачылышында Татарстан дәүләт киңәшчесе Миңтимер Шәймиев тә катнашкан күргәзмә "Яңарыш" фондының корылуына биш ел тулуга багышланды.

Күргәзмәдә Болгар һәм Зөя утрау-шәһәрчегендә уздырылган казу эшләрендә табылган археолгик табылдыклар күрсәтелде. Шулай ук, Болгар һәм Зөядәге мәдәни мирасның үткәнен һәм бүгенгесен чагылдырган рәсемнәр дә тәкъдим ителде.

Казан Кирмәне музей-тыюлыгы мөдире Зилә Вәлиева сүзләренчә, бу күргәзмә бар яктан да бик үзенчәлекле.

"Бүген монда Болгар тыюлыгы һәм Зөя утрау-шәһәрчегендәге музейларда сакланучы уникаль экспонатлар тәкъдим ителә. Күргәзмәдә шулай ук "Яңарыш" фондының биш ел буе башкарган эшчәнлеге дә күпмедер дәрәҗәдә чагыла. Бу эшләр үзегез дә белгәнегезчә искиткеч киң. Әлеге күргәзмә берүк вакытта безне Татарстанның мәдәни мирасының үткәне һәм бүгенгесенә бер сәяхәткә дә алып чыга", дип белдерде ул.

Татарстан дәүләт киңәшчесе, "Яңарыш" фонды җитәкчесе Миңтимер Шәймиев үз чыгышын күргәзмәгә килүчеләргә рәхмәт сүзләрен җиткереп башлады.

"Яңарыш" фонды җитәкчесе Миңтимер Шәймиев

"Яңарыш" фонды җитәкчесе Миңтимер Шәймиев

"Без барлык бу эшләрне сезнең белән бергә башкардык. Мин инде моңа кадәр дә әйткәнемчә, кешенең өстәлендә ипи булса һәм яшәгән өенең түбәсеннән акмаса, 100%лы укыган җәмгыять рухи кыйммәтләрен эзли башлый һәм без аларны табабыз", дип белдерде Шәймиев.

Татарстан археология институты директоры Айрат Ситдиков сүзләренчә, бу күргәзмә, Татарстанда булган уникаль мирасны өйрәнү, аны саклауның нәтиҗәләреннән чыгып караганда бик үзенчәлекле.

"Яңарыш" фонды башкарган эшчәнлек нәтиҗәсендә без үзебезнең мәдәни мирасыбызның, тарихыбызның яңа якларын ачтык. Монда күрсәтелгән әйберләр, бу фондның биш еллык эшенең бер мизгеле, бер бәләкәй генә өлеше булып тора. Без шушы әйберләр аркылы үзебезнең мирасның бай булуын күрәбез. Ул төрле мәдәниятләр белән бәйле. Әйтик төрки-болгар, Алтынурда, урыс дәүләте, мондагы фин халыклары белән бәйләнештә булган. Ягъни бу күргәзмә боларның барсын да чагылдырып тора.

Зилә Вәлиева һәм Айрат Ситдыйков

Зилә Вәлиева һәм Айрат Ситдыйков

Бу күргәзмә безнең рухи байлыгыбызны да күрсәтә. Монда ул мадди әйбер аша күренсә дә, ул безнең рухи байлык. Мираска игътибар итү, аны саклау - кешенең рухының үсешен, булган мирасны аңлавын күрсәтә. Әлеге күргәзмәдә без бу әйберләр аркылы үзебезнең бабайлардан калган байлыкны күрә алабыз", дип әйтте ул.

Миңтимер Шәймиев Азатлык сорауларын җаваплап якын көннәрдә Болгарда зур төзелешләр көтелмәвен җиткерде, әмма килгән кунаклар өчен кунакханәләр төзергә кирәклеген искәртте.

"Без биш ел эчендә шактый зур төзелешләр алып бардык. Хәзер Болгарда музейлар да, аларда карардай кыйммәтле табылдыкдар да бик күп. Туристлар аны бер көндә генә карап кайтып китсә, аның рәхәте калмый. Безгә хәзер Болгарда кунакханәләр төзергә кирәк. Халыкка төрле хезмәтләр күрсәтергә кирәк. Халыкның күңелен күтәрергә, аның күңелен җәлеп итәргә, аңа уңайлылыклар тудырырга кирәк. Без хәзер шуның өстендә эшлибез", дип белдерде ул.

XS
SM
MD
LG