Accessibility links

шимбә, 10 декабрь 2016, Казан вакыты 19:39

Казанда сәяси репрессияләргә каршы митинг


7 мартта Казанда сүз иреген яклап митинг үтте. Тинчурин паркы янында оештырылган чарада узган ел ахырында кулга алынган татар активисты Рәфис Кашаповның иреккә чыгарылуы һәм Русиядә барган сәяси репрессияләрнең туктатылуы таләп ителде.

Чарада, "Рәфис Кашаповны иреккә чыгаруны таләп итәбез", "Нәрсә өчен көрәшкәнен белә торган халык җиңелмәс", "Суд над Кашаповым-суд над свободой слова", "Каждому гарантируется свобода мысли и слова. Конституция РФ ст.29", "Статья 282 УК РФ-Орудие политических репрессий!", "Татарстан 2015=1937" дигән һәм башка татар һәм урыс телләрендә язылган шигарләр күтәрелде.

ТИҮ вәкиле Галишан Нуриәхмәт митингта ясаган чыгышында, Рәфис Кашапов дөреслекне әйткән өчен төрмәдә утыра дип белдерде.

"Русия империясендә халыкның дөреслекне әйтергә хакы юк. Беркемнең дә! Әнә Немцов та 1 март митингында дөреслекне әйтергә тиеш иде. Әмма аңа әйттермәделәр. Чөнки аның кебек дөреслекне әйтүчеләр юкка чыгарылалар. 20 еллап элек Старовойтова, Листьев хакыйкатьне әйтә башлаганнар иде. Аларны юкка чыгардылар.

Старовойтова, әгәр дә безнең дәүләткә Путин кебекләр килсә, Русиядә криминал дәүләт, бандит хөкүмәте булачак дип әйткән иде. Шулай әйткәне өчен аны 4-5 ай эчендә атып үтерделәр. Аны атып үтерүчеләрнең берсен дә тапмадылар. Чөнки табарга тиеш түгелләр.

Немцов та Путин, Украина турында дөреслекне әйтеп чыгарга тиеш иде 1 март көнне. Аны бер тәүлек алдан атып үтерделәр.

Бездә исә, дөреслекне әйткән Кашаповны атып үтерә алмадылар, ләкин ябып куйдылар", дип белдерде Галишан Нуриәхмәт.

Аксубай районы ТИҮ вәкиле Зилә Гариф үз чыгышын, Немцов белән Кашаповның язмышларын чагыштырудан башлады.

"Бу көннәрдә Мәскәүдә оппозициядәге Немцов атып үтерелде, Казанда халык каһарманы Рәфис Кашапов төрмәгә ташланды. Без акны ак, караны кара дип курыкмый әйтергә тиешбез. Шулай булмаса, ахмак, куркак сарык көтүе хәлендә калачакбыз җәмәгать. Ә куркаклар язмышы, билгеле, мәсхәрә астында үтә.

Русия халкы сарык көтүе түгел. Без 1 марттагы митинг мөрәҗәгатенә кушылып илдә зурайганнан зурая барган җитешсезлекләрне бетерүне, демократик кризисны һәм шуның аркасында булган икътисади кризисны кичекмәстән туктатуны таләп итәбез.

Без, Татарстан җитәкчеләреннән халык каһарманы Рәфис Рафаил улы Кашаповны иреккә чыгаруны таләп итәбез. Без, Конституция кануннары үтәлүен таләп итәбез!", дип белдерде ул.

Рәфис Кашаповны яклау митингының монысына Казандагы ТИҮ вәкилләре генә түгел, Чаллы, Түбән Кама, Алабуга һәм башка шәһәрләрдән килгән татар активистлары да катнашты. Гомумән, бу чарага җитмешләп кеше килгән иде.

Ике сәгатьләп барган митинг тыныч үтте, тәртип бозулар күзәтелмәде.

фикерләрне күрсәт

XS
SM
MD
LG