Кырымтатарлар сөргененә 71 ел тулуны "Азатлык" татар яшьләре берлеге егетләре Казанның Бауман урамында бу сөрген турында брошюра таратып искә алды. Анда 1944 елгы фаҗига, 2014 елда Кырымның Русия тарафыннан аннексияләнүе һәм Казан вә кырымтатарларның бер милләт булуы аңлатыла.
18 май Акмәчеттә ОМОН көчләре сөрген көненә багышланган машина йөрешен туктатып, алтмышлап кешене тоткарлап, полиция бүлегенә алып китте.
18 май Казанда сәяси золым корбаннарына һәйкәл янында кырымтатарларны сөргенгә җибәрүгә 71 ел тулуны митинг оештырып искә алдылар. Чыгыш ясаучылар Кырым һәм Казан татарларының аерылмас бер милләт булуын әйтте һәм Русия хөкүмәтеннән кырымтатарларның проблемнарын чишүне таләп итте.
18 майда Карасубазар үзәгендә сөрген корбаннарын искә алырга җыелган халыкка, матәм митингы булмаячак, аны үткәрергә рөхсәт юк, дип игълан ителде.
Азатлыкның Кырымдагы хәбәрчесе хәбәр итүенчә, бүген Карасубазарда полиция хезмәткәрләре милли әләмнәр эленгән җиңел машиналарны туктатырга тырышкан, ләкин алар бернигә карамыйча Акмәчәткә юл тоткан.
18 май Акмәчеттә ОМОН көчләре Бакчасарайга баручы кырымтатар әләмле машиналарны туктатып, андагы кешеләрне тоткарлады. Бу хакта Мәҗлес сәркатибе Дилявер Акиев Facebook битендә хәбәр итте.
18 май Акмәчетнең Кебир мәчетендә кырымтатар сөргене корбаннары рухына дога укылды. Доганы Кырым мөфтие Әмирали хәзрәт Аблаев укыды.
