Accessibility links

дүшәмбе, 5 декабрь 2016, Казан вакыты 01:35

Cебердә Cабантуйлар эстафетасын Индрәй халкы башлады. Быел ук гадәттәгедән соңарып бәйрәм ителде.

Элеккедән килгән традиция буенча, Төмән районының Индрәй авылында 1 май көнне Сабантуй үткәрелә. Быел бу авыл бәйрәме 30 майга калды. Сәбәбен авыл башлыгы Рөстәм Арипов болай аңлатты:

- Быел 9 майда Җиңүнең 70 еллыгын зурлап каршы алу хөрмәтеннән ул көн кичкә кадәр бәйрәм рухында уздырылырга тиеш дигән күрсәтмә алдык. Шуның өчен сабантуйны да 9 майга калдырдык. Безнең ниятләргә яңгыр комачаулады. Быел индрәйләр традицион чарага соңрак җыелдылар. Тик оттырмадык шикелле, көн бик матур бүген. Балалар да рәхәтләнеп уеннарда катнаштылар, көрәш, армрестлинг, гер күтәрү кебек спорт уеннары да яшьләрне үзенә тарта. Мәдәният хезмәткәрләре матур концерт оештырганнар. Җырчы, биючеләр дә җитәрлек бездә, балалар бакчасыннан ук татар телендә шигырь сөйләргә өйрәнәләр.

Киләсе елларда гадәтне бозмыйчан, Сабантуйны 1 майга планлаштырабыз.

Авылда балалар да, спортчылар да, үзешчәннәр дә җитәрлек. Аеруча көрәш ярышлары тирәсендә тупланган халык. Монда батыр статусын Айрат Арипов яулады. Җырчылар - Тубыл кунагы Роза Яхинаны, Төмән кызы Эльвира Янабаеваны яратып каршы алды тамашачы. Төрле ярышларда рәхәтләнеп уйнадылар балалар, аларга бүләкләрне индрәйләр үзләре җыйганнар иде.

Сәхнәдән хакимият башлыгы Раил Хөснуллин спонсорларны, хакимияткә 25 ел булу уңаеннан озак еллар эшләгән хезмәткәрләрне, авыл спортчыларын, быел юбилейларын каршы алган һәм алачак өлкәннәрне тәбрикләде. Ярдәмчеләр арасында “Батыр” спорткомлексына көрәш өчен келәм вәгъдә иткән өлкәнең спорт көрәше федерациясе президенты Александр Яковлев, спорт җиһазлары һәм автомобильгә тахограф бүләк иткән өлкә думасы депутатлары Николай Токарчук, Евгений Макаренко да бар.

XS
SM
MD
LG