Казанда 16 июнь булган каты давыл шәһәргә 25 миллион сумлык зыян китерде, дип хәбәр итте Төзелеш, архитектура һәм торак-коммуналь хезмәт министры урынбасары Алексей Фролов.
Аның сүзләренә караганда, төзекләндерү барган бер йортның түбәсен алып аткан. 16 июнь төштән соң Казанга килгән көчле давыл 200дән артык агачны аударды. Агачларның кайберләре төбе-тамыры белән куптарылып алынган иде. Алар балалар мәйданчыкларына, машина өсләренә, урамнарга ауды. Кешеләргә зыян килгән дигән хәбәр булмады.
Районнарда зыянны әле санап бетермәгәннәр. 19 июнь көнне дә һава торышын күзәтүче агентлык давыл булачак дип кисәтте.
