Рубльнең нык арзанаюы аркасында физик затлар моңарчы Русиядә тоткан акчаларын чит илләргә чыгарырга тотынган. 2015 елның икенче чирегендә иң күп акча Русиядән Швейцариягә күчерелгән – 51 млрд. сум. Икенче урында 50 млрд. сум белән – Үзбәкстан. Шулай ук, физик затлар Латвия белән АКШка да хәйран гына акча күчергән.
Русия төбәкләренә күз салсак, иң күп акча Мәскәү белән Мәскәү өлкәсеннән китеп барган. Икенче урында – Петербур.
Идел буе төбәкләрендә исә беренчелек – Самар өлкәсендә. Моннан 2015 елның икенче чирегендә генә чит илләргә 64 млн. доллар акча күчерелгән. Татарстан – Идел буе бүлгесендә икенче урында. Республикадан апрель-июнь айларында 42 млн. доллар күчерелгән.
Искәртәбез: бу физик затлар гына күчергән суммалар.
