Татарстанда кулланучылар хокуклары торышын күзәтүче федераль идарә Роспотребнадзор мәгълүматларына караганда, 25 февральдән 2 мартка кадәрге вакытта республикада ВИЧ вирусы белән авыручыларның 28 яңа очрагы теркәлгән.
Авыруларның сигезе Казанда, тугызы Чаллыда ачыкланган. Азнакай, Зәй һәм Тубән Камада икешәр; Бөгелмә, Яшел Үзән, Лениногорски, Норлат һәм Питрәчтә берәр авыру теркәлгән.
Узган елның көзендә Русия Сәламәтлек саклау министры Вероника Скворцова ВИЧ таралу куркынычы турында кисәткән иде.
"Бүленгән акчалар авыруларның 25-30% дәвалауга җитәргә мөмкин. Бу очракта эпидемия куркынычы туа. 2020 елга авырулар саны 250% артачак", диде министр.
Татарстан белән Башкорстанда инде берничә ел ВИЧ йоктыручылар һәм СПИДтан үлүчеләр саны арта.
