Левада үзәге үткәргән сораштыруларга күрә, русияләрне беренче чиратта бәйләр үсү, фәкыйрьлек, эшсезлек борчый. 77% русияле бәяләр үсүгә, 50%ка якыны фәкыйрьләнүгә һәм эшсезлеккә борчылу белдерә.
Сораштыруда катнашканнарның өчтән бердән артыграгы икътисад кризисына, чиреге рубльнең бәясе төшүгә, 26% керемнәрнең дөрес бүленмәвенә борчыла.
Фикер белдерүчеләр Русиядәге төп проблемнарга коррупцияне (24%), рухи, мәдәни кризисны (16%), медицина хезмәтенең кайбер төрләренең кыйммәт булуын (15%) кертә.
2015 ел белән чагыштырганда Украинадагы сугышка борчылучылар кимегән. Узган ел 28% булса, быел 14%ка калган.
Өч процент русияле генә бу исемлеккә хокукларны һәм демократик ирекләрне чикләүне керткән.
Социологларның узган ел үткәргән сораштыруларыннан быелгысы әллә ни аерылмый, халыкны экология, терактлар янавы, хезмәт хакларын тоткарлау күбрәк борчый башлаган.