Accessibility links

якшәмбе, 4 декабрь 2016, Казан вакыты 07:03

"Хәйрия чаралары күз буяуга әйләнмәсен иде"


24 июль Казанның Иске татар бистәсендә милли хәйрия ярминкәсе узды. Җыелган акча Теләче районы Иске Җөри авылындагы "Гаилә учагы" балалар йортына тапшырылачак ди оештыручылар. Шул ук вакытта чарага килүчеләр кайбер җитешсезлекләргә игътибар итте, соңгы вакытта мондый чараларның күз буяуга әйләнә баруын да әйтте.

Каюм Насыйри урамында рәт-рәт булып тезелгән сәүдә нокталарында милли киемнәр, кул эшләнмәләре, сувенир, китаплар һәм азык-төлек сатылды. Һәрбер ноктада диярлек акча җыю өчен махсус тартмачыклар куелган иде. Ачык һавада корылган сәхнәдә татар эстрадасы артистлары, шагыйрьләр катнашында концерт тамашасы күрсәтелде.

“Без, Болгар радиосы, хәйрия чараларында бик теләп катнашабыз. Узган Рамазанда гына радиода берничә шундый чара оештырдык. Ай дәвамында алар өчен кирәк-яраклар җыйдык, радиотыңлаучылар бик актив катнашты. Шушы чараны оештырганда безгә “Иске шәһәр” префектурасы мөрәҗәгать итте һәм бик теләп ризалаштык. Миңа калса, хәйрия беркайчан да артык түгел. Эш барышында авырлыклар булмады, җырчылар белән дә җайлы булды. Киләчәктә дә мондый чаралар күбрәк булсын иде”, ди Болгар радиосының музыкаль мөхәррире Илфар Кәримов.

Концертта 30га якын җырчы арасында булган Фәридә–Алсу дуэты белдергәнчә, милли киемле, татарча хәйрия ярминкәсе Иске татар бистәсенә тагын да ямь өсти.

“Бу бик матур милли бәйрәм, кешеләрнең йөзләреннән елмаю китми, күбесе милли киемнәрдән киенеп килгәннәр һәм ярминкәнең урыны да бик яхшы, чөнки мондагы йортларда татар тарихы сакланган.

Бүгенге көндә бер-беребезгә карата игътибар һәм мәрхәмәтлелек җитми. Бер яктан, җырчылар шәхси концертларыннан күпмедер акчалата ярдәм итсәләр, шушындый чаралар да бик кирәк”, диде җырчы ханымнар.

Биредә балалар өчен күңел ачу мәйданчыклары да бар иде. Кариев исемендәге яшь тамашачылар театры артистлары балаларга тамаша күрсәтте. Тик ярминкәгә килгән өлкән буын вәкилләре генә чарада озак була алмады. Биредә ял итү, утырып хәл алу өчен утыргычларның җитмәвеннән күпләр зарланды, шуңа да озак тоткарланмыйча, китә бардылар.

Ярминкәнең оештыру эшләре белән шөгыльләнгән “Ярдәм” тернәкләнү үзәге мөдире ярдәмчесе Лилия Сәлахетдинова сүзләренчә, мондый хәйрия бәйрәмен кечерәк масштабта, ләкин ешрак итеп, бер генә тармакка багышлап ясалса, отышлырак булыр иде. Ул әлеге чараны гаилә бәйрәме дип атады.

“Һәрбер өстәл кемгәдер багышланган. Кайберләре биредә сатылган акчадан хәйрия вакыфына күпмедер өлеш чыгара, үз файдаларына гына эшләүче сәүдәгәрләр дә бар”, дип җиткерде Лилия.

Ярминкә кунаклары – төрле буын вәкилләре. Күпләре массакүләм мәгълүмат чараларыннан ишетеп килсә, очраклы рәвештә килүчеләр дә бар.

“Оештыручыларга рәхмәт, безгә монда ошый һәм милли күргәзмәләр, ризыклар булуы да яхшы. Халыкның аз булуы гына борчый. Хәзер хәйрия концертлары модага кереп китте, алар еш уздырыла. Без дә әлеге вакыйгалардан читтә калмаска тырышабыз, чыгыш ясыйбыз. Кемнеңдер гомерен, сәламәтлеген саклап калу өчен үз өлешебезне кертәбез икән, бу бик куандыра. Шунысын да әйтергә кирәк, аларның чамасын да белергә кирәк”, диде бәйрәмдә тамаша кылган татар шоулары осталары Илсур һәм Гөлназ Шәрипҗановлар.

Икенче бер тамашачы -Алия Гасыймовага исә хәйрия бәйрәме бик үк ошап бетмәгән. “Оештыручыларга рәхмәтлемен, тик оештыру ягыннан күп нечкәлекләре уйланмаган, җитешсезлекләр бар”, ди ул.

Татарстанның Балык Бистәсе районы Олы Елга авылыннан Казан күрергә килгән Асия әби Сафиуллина Иске татар бистәсендәге милли хәйрия бәйрәмен ошатса да, соңгы вакытта мондый чараларның күз буяуга әйләнә баруын әйтте.

“Хәйрия концерты белән генә түгел, югарыда утыручылар мохтаҗларга төрле юллар аша булышсын иде. Балаларга гына түгел, карчыкларга да”, диде Асия әби.

Сүз уңаеннан, бу көннәрдә Асия әби һәм аның берничә ахирәте социаль челтәр йолдызына әйләнеп куйды. Казан Кирмәне яр буенда веломобильдә йөрүче ак яулыклы әбиләр интернетта йөзләгән кешеләргә хуш килде.

Ярминкәдә милли тауар сатучылар бәяләр үзгәрешсез дип белдерде. Ягъни, хәйрия уңаеннан тауар хакы күтәрелмәгән дә, төшмәгән дә. MISA бренды дизайнеры Миләүшә Мусина әлеге ярминкәдә милли калфаклар тәкъдим итте.

“Бүгенге сатудан җыелган акчаның күпмедер өлеше балалар йортына китәчәк. Безнең калфаклар төрле очракларга, яшьләр өчен дә, олылар өчен дә бара. Кызыксынучылар күп”, дип сөйләде ул. Аның өчен әлеге ярминкә, беренче чиратта, балаларга ярдәм итү булса, икенче яктан - үз-үзеңне күрсәтү. Тик сатучылар сүзләренчә, сату урыннары янәшәсенә урнаштырылган акча җыю тартмаларына игътибар итүчеләр бик аз булган.

Бәйрәм концертында күпләргә таныш скрипкачы Динә Закирова да чыгыш ясады.

“Әлеге чарага чакыруларына бик рәхмәтлемен. Биредә чыгыш ясавы да үзенчәлекле, башка төрле кабул итәләр, зәвыклы, чын-чынлап татарлыкны яратучы милли җанлы халык җыелган, шул күңелне бик җылыта. Хәйрия чараларында еш һәм бик теләп катнашам. Чөнки бу күңел өчен эшләнә торган эш һәм мин чын йөрәктән ярдәм итәм дип ышанам. Мохтаҗ кешеләрнең хәлләрен белеп, тормышларын күзәтеп барам”, диде Динә.

Хәйрия ярминкәсе көне буе барды, аны башкаланың “Иске шәһәр” префектурасы, Болгар радиосы, “Ярдәм” милли хәйрия вакыфы оештырды. Күзәтүчеләр фикеренчә, балаларга ярдәмгә берничә дистә мең акча җыелган булырга мөмкин.

фикерләрне күрсәт

XS
SM
MD
LG